Исроилнинг Ғазодаги янги операцияси, дронлар ҳужумига зўр берган Россия ва Ҳамаснинг ўлдирилган навбатдаги қўмондони – кун дайжести

Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.

{Yii::t(}

Ўтказиб юбориш 6s

Ўтказиб юбориш

Исроил Ғазода янги ҳарбий операцияни бошлади

Исроил қўшинлари Ғазо секторида «Гидеон жанговар аравалари» номини олган янги йирик ҳарбий операциянинг биринчи босқичини бошлади. Гап анклавнинг «стратегик ҳудудлари»ни назоратга олиш ҳақида кетмоқда.

Мудофаа вазирлиги баёнотида айтилишича, сўнгги 24 соат ичида армия «кенг кўламли ҳужумлар уюштирган ва Ғазо секторидаги стратегик ҳудудларни эгаллаш учун кучларни сафарбар қилган». Бу операциянинг дастлабки босқичи ва у “гаровга олинганларни озод қилиш ва ҲАМАС ҳаракатини йўқ қилиш учун» амалга оширилмоқда.

Исроил расмийлари оммавий ахборот воситаларига операция қуйидаги мақсадларни кўзлаганини билдирган. Хусусан, Исроил армиясининг Ғазони «забт этиши» ва ҳудуд устидан назоратни сақлаб туриши, Фаластин тинч аҳолисини жанубга кўчириш, ҲАМАС аъзоларига ҳужум қилиш, гуруҳнинг – ҳуманитар ёрдам таъминоти устидан назоратни қўлга киритишига йўл қўймаслик.

18 май куни бошланган, Исроил янги операция деб атаётган, Ғазо секторининг турли ҳудудларига уюштирилган оммавий ҳужумлар натижасида юзлаб ғазолик тинч аҳоли вафот этмоқда. Хусусан, Ғазо Соғлиқни сақлаш вазирлигининг Anadolu агентлигига маълум қилишича, 18 майдаги ҳужумлар оқибатида 106 нафар фаластинлик ҳалок бўлди.

Исроил қўшинлари Ғазога қарши интенсив ҳужумларни секторнинг шимолидаги Индонезия касалхонасини ўраб олиб, муассасага оғир артиллериядан ўқ узиш билан бошлади. Ғазо ССВ баёнотига кўра, ичкарида қолган 55 нафар беморлар ва тиббиёт ходимлари орасида кучли ваҳима ва тартибсизлик юзага келган. Соғлиқни сақлаш вазирлиги тегишли халқаро ташкилотларни юз бераётган воқеалар бўйича зудлик билан чоралар кўришга чақирди.

Ҳамаснинг навбатдаги қўмондони ҳам ўлдирилди

Ғазо сектори жанубидаги Хон Юнус шаҳрида жойлашган туннелдан ҲАМАС етакчиси Муҳаммад Синварнинг жасади топилди. У Исроил авиазарбаси оқибатида бир неча кун олдин ўлдирилган, деб хабар беради Al Arabiya ўз манбаларига таяниб.

Хон Юнусдаги Европа шифохонаси ҳудудидан Синвардан ташқари унинг 10 нафар ёрдамчисининг ҳам жасади топилган.

Исроил ҳарбийлари Хон Юнусдаги Европа шифохонасига 13 май куни авиарзарбаларни амалга оширган эди. ЦАҲАЛ хабарига кўра, шифохона остида ҲАМАСнинг қўмондонлик пункти бўлган.

Исроил Мудофаа армияси ҳозирча Муҳаммад Синварнинг ўлимини тасдиқламади. Мудофаа вазири Исраэл Кац ташқи ишлар ва мудофаа қўмитасига ҳозирча Синварнинг ўлими ҳақида ҳеч қандай расмий тасдиқ йўқлиги, аммо «барча белгилар бўйича у йўқ қилингани»ни билдирган.

Муҳаммад Синвар — 2024 йил октябр ойида Ғазо секторида ўлдирилган ҲАМАСнинг олдинги етакчиси Яҳё Синварнинг укаси. Яҳё Синвар ўтган йилнинг августида Исмоил Ҳания ўлдирилганидан кейин ҲАМАС сиёсий бюроси раҳбарига айланган эди. Муҳаммад Синвар ҳам акаси каби ҲАМАС таркибига ёшлигидан қўшилган. Исроил махсус хизматлари бир неча бор уни ўлдиришга уринган, аммо шу кунгача буни уддалай олмаётган эди.

Ватиканда инаугурация ва сиёсий учрашув

18 май куни янги Рим папаси Лев XIV нинг лавозимга киришиш маросими бўлиб ўтди. Ватиканнинг маълум қилишича, маросимга 150 мингга яқин одам ва юзлаб сиёсатчилар тўпланган. Хусусан, маросимдан сўнг Украина президенти Володимир Зеленский — янги понтифик, АҚШ вице-президенти Жей Ди Вэнс ва давлат котиби Марко Рубиолар билан учрашди.

Зеленский ва Вэнс охирги марта феврал ойида Оқ уйда учрашган, ўшанда Зеленский, Вэнс ва Трамп ўртасида Украинадаги уруш ва АҚШнинг ёрдами учун миннатдорлик ҳақида тарихий тортишув рўй берганди. АҚШ томони билан учрашувда Туркиядаги музокаралар ҳақида гап кетган.

«Президент Истанбулдаги музокаралар ва Россия томонидан мустаҳкам сулҳ режимини ўрнатиш учун қўйилган нореал шартлар ҳақида маълумот берди. Россия делегациясининг паст даражаси унинг ҳеч қандай қарор қабул қилиш ваколатига эга эмаслигини кўрсатди», – дейилади Украина президент офиси хабарида.

Зеленский Россия ўзи таклиф қилган ўт очишни тўхтатиш режимини қандай бузгани ҳақида ҳам гапирган.

«Буларнинг барчаси Москва урушни тўхтатиш ниятида эмаслигини кўрсатади. Айнан шу туфайли Россияни тўлиқ, сўзсиз ўт очишни тўхтатишга рози бўлишга мажбурлаш учун босим ўтказиш зарур», – деди у.

Украина президенти офиси маълум қилишича, учрашувда ҳар бир томоннинг позицияси ва вазиятни ўзгартириши мумкин бўлган кейинги қадамлар, жумладан, Россияга қарши кучли санкциялар батафсил муҳокама қилинган.

Бу вақтда Россия яна дронлар ҳужумига зўр бермоқда. Хусусан, Россия ва Украина делегацияларининг Истанбулдаги учрашувидан бир кун ўтиб, Россия қўшинлари Украина ҳудудига турли русумдаги 273 та дронни учирди. Қайд этилишича, бу – россияликларнинг кенг кўламли уруш бошланганидан бери энг йирик дронлар ҳужуми бўлди.

Украина қуролли кучлари ҳарбий-ҳаво кучлари маълумотига кўра, 273 та зарбдор дрондан 88 таси уриб туширилган, 128 та «имитатор дрон» эса қулаб тушган ва жиддий зарар етказмаган. Киев областидан ташқари, Днипропетровск ва Донецк областларига ҳам дронлар учиб келган.

Ню Йоркда Мексика ҳарбий кемаси Бруклин кўпригига урилди

Ню Йоркда Мексика ҳарбий кемаси Бруклин кўпригига урилди. Кема мачталари кўприкнинг остки қисмига урилиши оқибатида синиб тушган. Ҳодиса оқибатида 22 киши жароҳат олган ва шифохоналарга ётқизилган, улардан ярмининг аҳволи оғир. Яна икки киши ҳалок бўлган.

Тўқнашувда кеманинг учала мачтаси ҳам шикастланган ва қулаб тушган. «Айни дамда бортда бўлган 277 кишидан 19 нафари жароҳат олган, улардан 2 нафари оғир аҳволда қолмоқда, яна 2 нафари, афсуски, олган жароҳатларидан вафот этган», – деб ёзди Ню Йорк мэри Эрик Адамс.

Интернетда эълон қилинган видеода елканлари йиғиштирилган ва такелажда байрам чироқлари ёқилган кема кўприк остидан ўтишга урингани ва мачталар кўприкка урилиб, Ист-Риверга қулаганини кўриш мумкин.

Ҳодиса рўй бериши арафасида юзлаб томошабинлар сешанбадан бери Манҳэттеннинг жанубий қисмидаги бандаргоҳда турган кема билан хайрлашиш учун йиғилганди.

Испанияда юзлаб бошпанасизлар аэропортни «эгаллаб олди»

Испаниянинг энг йирик аэропортларидан бири — Мадрид-Баражасда бошпанасизлар сони кескин ошмоқда, деб хабар беради Daily Mail. Испания ОАВ маълумотларига кўра, аэропортдаги «рўйхатдан ўтмаган фуқаролар» сони 50 кишидан қарийб 500 кишига қадар ошган.

Қайд этилишича, айниқса вазият 4-сонли терминалда мураккаблашган, чунки расмийлар олдинроқ аэропортнинг бошқа ҳудудларида яшаб келган бошпанасизларнинг аксариятини шу ерга кўчирган. Гувоҳлар ҳожатхоналар поли, экранлар орти ва ресторанлар залида ухлаб ётган инсонларни суратларга олган. Аэропорт ходимлари санитария шароити ёмонлашгани, тажовуз ҳолатларидан шикоят қиляпти — баъзи уйсизлар пичоқ кўтариб, гиёҳванд моддалар ҳам истеъмол қилмоқда.

Яқинда тахта қандаласи (ҳашарот) кўпайиши хавфи сабаб алоҳида ҳудудларни дезинфекция қилишга тўғри келган. Касаба уюшмалари ходимлари туристларни ҳимоя қилиш ва бошпанасизларни керакли шароитлар билан таъминлаш учун зудлик билан чоралар кўрилишини талаб қилмоқда.

Аэропортдан қўним топганларнинг аксарияти — меҳнат бозоридаги омадсизликлардан кейин бошпанасидан айрилган мигрантлардир.

Жо Байденда простата саратони аниқланди

АҚШнинг собиқ президенти, 82 ёшли Жо Байденга «простата саратонининг агрессив шакли» ташхиси қўйилган, деди унинг матбуот котиби 18 май, якшанба куни.

«Президент Жо Байден ўтган ҳафтада касаллик аломатларини сеза бошлаганидан сўнг простата безида тугун аниқлангани сабабли текширилди», — дея хабар тарқатди АҚШ ОАВлари. «16 май куни унга простата саратони ташхиси қўйилди, у суякларга метастазлар берган ҳамда Глисон шкаласи бўйича 9 балл билан тавсифланди».

CNN нашри ўз манбасига таяниб хабар беришича, Байден шу дам олиш кунлари Делавер штати Вилмингтондаги уйида бўлиб турибди. Жо Байден ва унинг оиласи даволаш усулларини баҳолаш учун шифокорлари билан ишламоқда.