Украина уруш бошланганидан бери 49 минг эркакнинг хорижга чиқиб кетишининг олдини олди

Ҳарбий ҳолат режими жорий этилгандан буён Украина чегараларида 49 минг чақирув ёшидаги эркак ноқонуний равишда мамлакатни тарк этишга урингани учун ҳибсга олинди. Бу ҳақда 21 май, чоршанба куни Украина янгиликлар телемаронида Украина Давлат чегара хизмати матбуот котиби Андрей Демченко маълум қилди.

Унинг сўзларига кўра, чегаранинг «яшил қисми»да, назорат-ўтказиш пунктларида ёки чегара ҳудудларидаги назорат-ўтказиш пунктларида чегарани ноқонуний кесиб ўтишга уринган деярли 45 минг киши қўлга олинган. Яна 4000 га яқин одам «сохта ҳужжатлар ёки бошқа ноқонуний воситалар ёрдамида чегарани кесиб ўтишга уринган», деди Демченко.

«Бу ҳолатда гап чегарани ноқонуний кесиб ўтишга муваффақ бўлган шахслар ҳақида кетмаяпти, чунки бундай маълумотларни чегарани ноқонуний кесиб ўтган ушбу фуқароларни қўлга олган қўшни давлатларгина айтиши мумкин», — дея қўшимча қилди Давлат чегарасини қўриқлаш хизмати матбуот котиби.

Андрей Демченко, шунингдек, унинг хизмати Европа давлатларидаги ҳамкасблари билан чегарани ноқонуний кесиб ўтишга уринишларга биргаликда қарши туриш мақсадида фаол ҳамкорлик қилаётганини маълум қилди. Умуман олганда, эркакларнинг чет элга қочишига ёрдам берган 900 га яқин уюшган гуруҳларнинг фаолияти фош қилинди. Қочиш учун улар 4500 дан деярли 11 минг еврогача пул тўлашган, дея қўшимча қилди Демченко.