Қўшимча функционаллар
-
Тунги кўриниш
Трамп Байденнинг Украина жанговар ҳаракатларига қўйган барча чекловларини бекор қилмоқчи
Россияни «жазолаш» ва Украинани қўллаб-қувватлашнинг «кейинги босқичлари» бўйича қарор жорий ҳафта Вашингтонда бўлиб ўтадиган учрашувида қабул қилинади.
Фото: REUTERS
АҚШ президенти Доналд Трамп Украина ҳарбий ҳаракатларига Жо Байден томонидан қўйилган барча чекловларни олиб ташлаш имкониятини «жиддий кўриб чиқмоқда». Бу ҳақда Kyiv Post нашри Ғарбдаги икки амалдорга таяниб хабар берди.
Гап айнан қандай чекловлар ҳақида кетаётганига — масалан, қурол етказиш ёки Россия ҳудудига зарбалар бериш — хабарда аниқлик киритилмаган.
«Олдин жорий этилган барча чекловлар айни вақтда қайта кўриб чиқилмоқда. Чунки президент Трамп ҳозирги статус-кво Россияни музокаралар столига жалб қилиш бўйича умумий манфаатларимизга жавоб бермайди, деб ҳисобламоқда», — дейди нашр суҳбатдоши.
Манбанинг сўзларига кўра, Россияни «жазолаш» ва Украинани қўллаб-қувватлашнинг «кейинги босқичлари» бўйича қарор америкалик амалдорларнинг германиялик ҳамкасблари билан жорий ҳафта Вашингтонда бўлиб ўтадиган учрашувида қабул қилинади. АҚШга яқин кунлар ичида, хусусан, Германия ташқи ишлар вазири Йоханн Вадефул ташриф буюриши кутилмоқда.
26 май куни Германия канцлери Фридрих Мерц АҚШ, Германия, Буюк Британия ва Франция Украинага етказиладиган қурол-яроғнинг зарба бериш масофасига қўйилган чекловларни бекор қилганини айтди. Кремл ушбу қарорни «хавфли» деб атади.
The Wall Street Journal маълумотларига кўра, Трамп 1 июнгача Россияга қарши санкциялар жорий этиш вариантини кўриб чиқмоқда. Таъкидланишича, АҚШ президенти Россия етакчиси Владимир Путин жанговар ҳаракатларни давом эттираётганидан «ҳафсаласи пир бўлган».
