Станислас Вавринка Жоковични енгиб, US Open ғолибига айланди

АҚШнинг Нью-Йорк шаҳрида теннис бўйича "Катта Дубулға" туркумига кирувчи US Open-2016 турнири якунланди.

Эркаклар ўртасидаги мусобақанинг ҳал қилувчи финал баҳсида швейцариялик Станислас Вавринка дунёнинг биринчи рақамли ракеткаси, сербиялик Новак Жоковичга қарши кортга чиқди.

3 соату 54 дақиқа давом этган учрашувда Вавринка 6:7(1:7), 6:4, 7:5, 6:3 ҳисобларида устун келиб, бош мукофот эгасига айланди.

Бу 31 ёшли теннисчи учун "Катта Дубулға" туркумига кирувчи турнирлардаги учинчи соврин бўлди. Бунга қадар у 2014 йили Australian Open ҳамда 2015 йили "Ролан Гаррос" турнирларида ғолиб чиққанди.

Шу билан биргаликда Вавринка-Жокович қарама-қаршиликларида умумий баҳс 19:5 ҳисобида сербиялик спортчи фойдасига.

Бундан олдинроқ, турнирнинг аёллар ўртасидаги баҳсларида германиялик Анжелика Кербер чехиялик Каролина Плишковани мағлуб этиб, АҚШ Очиқ чемпионатларидаги илк совринини қўлга киритгани хабар қилинганди.