MWC 2017: Яна 2та флагман тақдим этилди

Барселонадаги MWC 2017 кўргазмасида Huawei компанияси икки флагманини тақдим этди — Huawei P10 ва P10 Plus.

Ушбу икки смартфон аввалги моделдан фарқли равишда нафақат асосий камера, балким олд камерада ҳам Leica оптикаси ўрнатилган. Асосий камера 12 ва 20 мегапикселли икки модулдан иборат. Бундан ташқари, компания аниқлаш тизимининг яхшиланганини маълум қилди. Экран атрофидаги рамка 50 фоизга юпқароқ қилинди. 

Huawei P10 5,1 дюймли Full HD экран билан жиҳозланган. Шунингдек, унга 4 ГБ тезкор ва 32 ГБ доимий хотира ва 3200 мАс аккумулятор ўрнатилган. 

Huawei P10 Plus эса 5,5 дюймли Quad HD экранига эга бўлиб, унда 4 ГБ тезкор ва 64 ГБ доимий хотира (6 ГБ тезкор ва 128 ГБ доимий хотирага эга версияси ҳам мавжуд) ва 3750 мАс аккумулятор мавжуд. 

Смартфонлар 2,5 ГГц тактли частотада ишлайдиган 8 ядроли HiSilicon Kirin 960 процессорида ишлайди. Шунингдек, улар LTE cat 12, Wi-Fi (802&11 a/b/g/n/ac), NFC, Bluetooth 4.2, USB Type-C порти ва Huawei SuperCharge 3.0 тезкор зарядлаш функциясини ҳам қўллаб қувватлайди. 

Huawei P10 ва P10 Plus 2017 йилнинг март ойидан сотувга чиқади. Уларнинг дастлабки баҳоси 649 евро ва 699/799 евро қилиб белгиланган.