Трампга тегишли бинода яна ёнғин чиқди

7 апрелда Дональд Трампга қарашли, Манхэттендаги Trump Tower биносининг 50-қаватидаги квартиралардан бирида ёнғин чиқди. Оқибатда бир киши ҳалок бўлган, 4 киши жароҳатланган. Бу ҳақда CNN телеканали хабар берди.

Маълум қилинишича, ёнғин чиққан квартирада яшаган одам ҳалок бўлган. У шифохонага етказилган, бироқ унинг ҳаётини сақлаб қолишнинг иложи бўлмаган. 

“Биз ҳозир ёнғин нима сабабли чиққанини билмаймиз”, деб айтган ўт ўчириш хизмати бошлиғи Дэниел Нигро.

Унинг таъкидлашича, ёнғин вақтида Трамп оиласининг бирорта аъзоси бинода бўлмаган. Бинонинг энг юқори 58-қаватида Трамп компаниясининг офиси жойлашган. Трампнинг оиласи Оқ уйга кўчиб ўтгунча, шу бинода яшаган. Шунингдек, 2016 йилда ушбу бинода Трамп сайловолди компанияси штаби жойлашган. 

Трамп твиттер орқали ёнғин ўчирилганини маълум қилган ва ўт ўчирувчиларга қилинган иш учун миннатдорлик билдирган. 

Январда ҳам бинода ёнғин юз берганди. Ўшанда 2 киши жабрланганди. Ёнғиннинг сабаби сифатида шамоллатиш тизимидаги электр линиясининг носозлиги айтилган.