Юнусобод туманида юз берган ЙТҲ оқибатида бир киши вафот этди

Тошкент шаҳар Ички ишлар бош бошқармаси Юнусобод туманида рўй берган йўл-транспорт ҳодисаси тўғрисида маълумот берди.

2021 йил 19 август куни тахминан соат 01:30ларда Юнусобод тумани Боғишамол кўчасида 31 ёшли фуқаро «Лаcетти» русумли автомобилни бошқариш давомида пиёдани уриб юборган.

Пойтахт ИИББ хабарига кўра, йўл-транспорт ҳодисаси оқибатида пиёда, 51 ёшли фуқаро жароҳатлар туфайли воқеа жойида ҳаётдан кўз юмган.

Мазкур факт бўйича Тошкент шаҳар ИИББ Тергов бошқармаси томонидан Ўзбекистон Республикаси Жиноят кодексининг 266-моддаси 2-қисми бўйича жиноят иши қўзғатилди. 

Қайд этилишича, ҳозирги вақтда тергов ҳаракатлари давом этмоқда.