Buyuk Britaniya qamoqxonalarida bo‘sh joylar kam qolgani ma’lum qilindi

Hozirda mamlakat qamoqxonalarida atigi 800 ta bo‘sh joy qolgan. Rasmiylar bu qisqa fursatda to‘lishini aytmoqda.

Foto: AP

Buyuk Britaniya qamoqxonalarida atigi 800 ta joy qolgani bois yaqin haftalarda mahbuslar jazoni vaqtincha saqlash izolyatorlarida o‘tashga majbur bo‘ladi. Jazoni ijro etish xizmati va Milliy politsiya boshliqlari kengashi o‘rtasida bu borada kelishuvga erishilgan, deb xabar bermoqda Sky News.

Hozirda Britaniya qamoqxonalarida 87 ming 556 nafar mahbus saqlanmoqda. Rasmiylarning ta’kidlashicha, bo‘sh turgan joylar tezda to‘ladi, shu bois bir necha haftaga bo‘lsa ham vaqtincha saqlash izolyatorlari kabi tegishli tartibda jihozlangan muassasalar talab etiladi.

«Himoya» operatsiyasi nomli kelishuv idoralar o‘rtasida 2006 yilda qamoqxonalarning to‘lib ketish muammosini favqulodda hal etish maqsadida imzolangan. Oxirgi marta undan 2024 yil may oyida foydalanilgan edi. O‘tgan yilning sentabrida Britaniya hukumati zo‘ravonlik bilan bog‘liq bo‘lmagan va jazo muddatining 40 foizini o‘tab bo‘lgan mahbuslar sonini keskin qisqartirishni boshlagan. Ammo ushbu chora kutilganidek natija bermadi.

Hukumat 2031 yilga qadar 14 ming mahbus uchun yangi qamoqxonalar qurishni rejalashtirmoqda.

Eslatib o‘tamiz, 2024 yil avgust oyida Britaniya o‘z mahbuslari uchun Estoniya qamoqxonalarini ijaraga olishi mumkinligi to‘g‘risida xabar berilgandi. Shuningdek, Buyuk Britaniyada sudyalarga kichik jinoyatlarda ayblanganlarni qamoq jazosiga mahkum qilmaslik tavsiya berilgan.

#Buyuk Britaniya #qamoqxona