Мирзиёев пойтахтнинг Ойбек кўчасидаги уйларда ишга туширилган замонавий қозонхоналарни бориб кўрди

Шавкат Мирзиёев 6 май куни пойтахтимизнинг Ойбек кўчасидаги кўп қаватли уйларда ишга туширилган замонавий, энергиятежамкор локал қозонхоналарни бориб кўрди, деб хабар бермоқда ЎзА.

Ўзбекистонда аҳоли фаровонлигини юксалтириш, хонадонлар ва ижтимоий соҳа объектларини иссиқлик энергияси ва иссиқ сув билан узлуксиз таъминлаш бўйича изчил чора-тадбирлар амалга оширилмоқда. Давлат раҳбарининг шу йил 20 апрелдаги “2018-2022 йилларда иссиқлик таъминоти тизимини ривожлантириш дастури тўғрисида”ги қарори бу борадаги ишларни янги босқичга кўтаришда муҳим омил бўлмоқда. 

Ушбу қарорга мувофиқ Тошкент шаҳрида иссиқлик таъминоти тизимини янгилаш ва модернизация қилиш, энергия самарадорлиги юқори бўлган маҳаллий қозонхоналар қуриш, хонадонларга якка тартибда ички иссиқлик тармоғини ўрнатиш, кўп қаватли уй-жой фонди ва ижтимоий соҳа объектларининг локал иссиқлик таъминоти тизимини ривожлантириш бўйича кенг кўламли вазифалар белгиланган. 

Пойтахтдаги марказлашган иссиқлик таъминоти тизими ўтган асрнинг 60-70 йилларида барпо қилинган бўлиб, бугунги кунда қозонхона ускуналари ва тармоқлар техник ва маънавий эскиргани, марказий қозонхоналар истеъмолчилардан узоқ масофада жойлашганлиги сабабли иссиқлик етказиб беришда айрим муаммолар юзага келмоқда. 

Юқоридаги қарорга асосан пойтахт туманларида замонавий қозонхоналар қуриш, қуёш энергияси билан сувни иситадиган гелиоқурилмалар негизида уй-жойлар ва ижтимоий объектларни иссиқлик билан таъминлаш тизимини барпо этиш бўйича дастур ишлаб чиқилмоқда. 

Унга кўра жорий йилда пойтахтда жами 211, жумладан, кўп қаватли уйлар том қисмида 134, мавзелар ҳудудида 77 маҳаллий қозонхона қурилади. Ушбу мақсадлар учун сарфланадиган 170 миллиард сўм маблағ тижорат банклари кредитлари ҳисобидан молиялаштирилади. 

Ойбек кўчасидаги 40- ва 42-уйларда ишга туширилган қозонхоналар гелио сув иситгичлари билан жиҳозланган. Ушбу қозонхона анъанавий марказлашган иситиш тизимига қараганда бирмунча афзалликларга эга. Аввало, қозонхонада замонавий технология асосида қуёш нуридан иссиқлик энергияси ишлаб чиқарилиб, хонадонларга керакли миқдорда тақсимланади. Бу ёқиладиган табиий газни тежаш, истеъмолчиларга иссиқлик энергияси етказиб беришда йўқотишлар ва қиш мавсумида авария ҳолатларининг олдини олиш, ортиқча сарф-харажатларни камайтириш имконини беради. 

Қозонхонада соатига 146 киловатт иссиқлик энергияси ишлаб чиқарилади. Лойиҳанинг қиймати 460 миллион сўм бўлиб, харажатлар “Тошиссиққуввати” ишлаб чиқариш бирлашмаси унитар корхонаси ҳисобидан қопланган. 

Уй юқорисидаги техник қаватда қозонхона, томда қуёш коллекторлари ўрнатилган. Давлат раҳбари ушбу локал қозонхонани кўздан кечирди. 

Қуёш сув иситгичлари экологик тозалиги, кўп хизмат талаб этмаслиги ва узоқ муддат фойдаланиш мумкинлиги билан ажралиб туради. Бундай қурилмалар нафақат қуёшли, балки булутли кунларда ҳам энергия ишлаб чиқара олади. 

Мазкур соҳадаги ишлардан кўзланган асосий мақсад кўп қаватли уйларда яшовчи аҳоли учун қулай шарт-шароит яратишдир, деди Президент. Коммунал соҳани янада такомиллаштириш ва кўрсатилаётган хизматлар сифатини ошириш учун қуёш энергияси асосида ишлайдиган иссиқлик энергияси тизимига ўтишни ҳаётнинг ўзи тақозо этмоқда. Шу нуқтаи назардан, Тошкент шаҳрида келгуси уч йилга мўлжалланган алоҳида тизим ишлаб чиқамиз. Бу тизим қуёш энергияси ёрдамида уй-жойлар ва ижтимоий объектларни иссиқ сув ва энергия билан узлуксиз таъминлаш, энергия ресурсларини тежаш ва аҳоли фаровонлигини оширишга хизмат қилади. 

Давлат раҳбари гелиоқурилмалар ишлаб чиқарувчи маҳаллий корхоналар маҳсулотлари намуналари билан ҳам танишди. 

Қозонхоналарни қуриш ва улардан фойдаланишда замонавий технологияларни қўллаш, малакали мутахассисларни жалб этиш борасида зарур кўрсатмалар берилди.