БАА Қатарга почта жўнатмалари юборишни тўхтатди

Фото: РИА "Новости"

Бирлашган Араб Амирликлари (БАА) ҳукумати Қатарга почта жўнатмалари юборишни тўхтатиб қўйди. Бу ҳақда БААнинг миллий почта хизмати - Emirates Post Group сайтида хабар қилинган.

"Emirates Post Group БАА ҳукумати топшириғига кўра, 2017 йилнинг 6 июнидан бошлаб Қатарга барча турдаги почталарнинг юборилишини тўхтатди", - дейилади матбуот релизида.

5 июнь куни Баҳрайн, БАА, Саудия Арабистони, Миср, Яман, Ливия муваққат ҳукумати, Мальдив Республикаси ва Маврикий Республикаси Доҳа билан дипломатик алоқаларни узишгани ҳақида маълум қилишди. Уларнинг фикрича, амирлик терроризм ва экстремистик мафкурани қўллаб-қувватлайди ҳамда араб давлатларига нисбатан душманлик кайфиятидаги сиёсатни олиб боради. Кейинчалик улар сафига Мавритания ва Комор қўшилди, Иордания ва Жибути эса дипломатик ваколатхоналари даражасини пасайтиришди.

#БАА #почта #Қатар

Форс кўрфазида жиддий сиёсий инқироз юзага келди. Саудия Арабистони, Миср, Баҳрайн, БАА, Яман, Ливия ва Мальдив бошқа бир араб давлати Қатар билан дипломатик алоқаларни узди. Бунга Қатар Эронни ва терроризмни қўллагани сабаб сифатида кўрсатилмоқда.