Subaru автомобилсозлик компанияси Японияда муаммоларга дуч келди

Subaru япон компаниясининг Гумма префектурасидаги заводида бренд автомобиллари хавфсизлигини текшириш тегишли малакага эга бўлмаган ишчилар томондан амалга оширилгани аниқланди. Аввалроқ шундай муаммо Nissan заводларида аниқланганди.

Subaru 30 октябрда Япониянинг ер, инфратузилма ва транспорт вазирлигига юқоридаги ҳолат бўйича ўтказилган ички тергов натижалари ҳақида ҳисобот бермоқчи. Компанияда таъкидланишича, автомобиллар хавфсизлигини текширганр ходимлар тегишли малакага эга бўлганлар, бироқ компанияда ҳужжатлар билан ишлашда бир қатор камчиликларга йўл қўйилгани оқибатида барча ишчилар малака ҳақидаги сертификатларни ўз вақтида олишмаган.      

Тахмин қилинишича, бу амалиёт компания томондан охирги 30 йил ичида қўлланган. Компания жавоб чораси тариқасида транспорт воситалари якуний текширувини ўтказиш қоидаларини Японияда қабул қилинган стандартларга мослаштириш учун қайта қўриб чиқмоқчи. 

Бундан ташқари, компанияда тегишли тарзда текширилмаган барча машиналар қайтарилиб олиниши мумкинлиги имконияти кўриб чиқилмоқда. Тахмин қилинишича, бу жараён бренднинг бутун дунё бўйлаб 300 минг машинасини қамраб олиши мумкин. Вужудга келган вазият сабабли компания мижозлар ва манфаатдор томонлар вакилларидан узр сўраган.