Трамп Опра Уинфри президентлик сайловларида қатнашишидан умид қилмоқда

АҚШ президенти Дональд Трамп твиттердаги саҳифасида телебошловчи Опра Уинфрининг «60 дақиқа» телешоусидаги иштирокига изоҳ берди. Унинг давомида Уинфри Трампнинг бошқаруви ҳақида салбий фикр билдирган.

«Ҳозиргина қачонлардир мен жуда яхши билган, ўзига ишончи қолмаган Опра Уинфри «60 дақиқа» кўрсатувида бир неча кишидан интервью олганини кўрдим. Саволлар нообъектив ва ҳақиқатдан йироқ бўлди, далиллар эса – нотўғри. Умид қиламанки, Опра АҚШ президентлиги учун сайловларда иштирок этади, у худди барча каби мағлуб бўлиши керак!», - дея ёзган Трамп.

Эслатиб ўтамиз, аввалроқ телебошловчи Опра Уинфри 2020 йилги АҚШ президентлиги сайловида иштирок этишга қизиқиш билдиргани тўғрисидаги хабар тарқаганидан сўнг, амалдаги президент Дональд Трамп бундай муносабатга баҳо берганди. Дональд Трамп «Оқ уй учун сайловда Опрани ҳам ютишини» билдирган.