Мугабенинг 120тадан ортиқ компьютерини ўмариб кетишди

Фото: Reuters

Зимбабве собиқ президенти Роберт Мугабедан 119та ноутбук ва еттита стационар компьютерни ўғирлаб кетишди. Бу ҳақда NewsDay маҳаллий нашри хабар қилмоқда.

Таъкидланишича, Мугабе истеъфога чиққанида, унинг оиласидан расмий қароргоҳдан нарсаларни олиб чиқиб кетиш сўралган. Чекланган вақт сабабли маълум бир буюмлар вертолёт майдончаси ёнида ёпиқ қутиларда қолдирилган.

Нарсалар йўқолгани сешанба, 3 апрель куни маълум бўлди. Ўша куни қолган буюмлар Мугабенинг Борроудейлдаги хусусий қароргоҳига олиб кетилди. Собиқ биринчи хоним Грейс Мугабе полицияга ариза ёзди, буни унинг адвокати тасдиқлади.

Иддао этилишича, компьютерларни мактабларга хайрия қилиш режада бўлган.