Депутатлар Сапар Исаковга парламентда чиқиш қилишга йўл қўйишмади

Фото: Қирғизистон ҳукумати матбуот хизмати

Қирғизистон бош вазири вазифасини бажарувчиси Сапар Исаков депутатлар олдида чиқиш қилишни сўради. Бу ҳақда ҳукумат матбуот хизмати хабарида айтилган.

Пайшанба куни Жогорку Кенеш Вазирлар Маҳкамасига ишончсизлик вотуми билдирди. Президент ҳукуматни истеъфога чиқариш ҳақидаги фармонини имзолаб бўлган.

Исаков парламент спикери Достонбек Жумабековга халқ депутатлари қаршисида мурожаат билан чиқишни сўраб хат йўллаган.

Манбанинг айтишича, Исаковга бош вазир сифатидаги охирги сўзларини айтишга имкон беришмаган.

Айни вақтда парламент йиғилиши ўтказилмоқда, Сапар Исаков унда қатнашмаяпти.