«Порту» «Бенфика»нинг 4 йиллик гегемонлигига барҳам берди

«Порту» Португалия чемпионатининг 2017/18 йилги мавсум чемпионига айланди. «Аждарлар» 33-турда «Спортинг» ва «Бенфика» жамоалари ўзаро ўйинда дуранг (0:0) қайд этишгач, чемпионликни расмийлаштиришди.

Португалияда чемпионат тугашига бир тур қолганида «Порту» «Бенфика» ва «Спортинг»ни 4 очкога ортда қолдириб кетди ва эндиликда таъқибчилари ета олмайдиган даражага чиқди.

«Порту» ўз тарихида 28-марта, 2012/13 йилги мавсумдан буён илк марта Португалия чемпионатида зафар қучди. Бунгача «Бенфика» кетма-кет 4 мавсум ҳеч кимга титулни бермай келаётганди. Айни вақтда Португалияда чемпион бўлиш бўйича «Бенфика» рекордчи (36 марта) саналади. Кучли учликни «Спортинг» (18) якунлаб беради.