Зинченко АПЛ кубогини тушириб юборди, Рамос уни қаерда тузатиш мумкинлигини айтди

Англия Премьер-Лигасининг 37-туридан ўрин олган «Манчестер Сити» — «Ҳаддерсфилд» (0:0) ўйинидан сўнг, «шаҳарликлар»ни чемпионлик билан қутлаш маросими бўлиб ўтди. 

Тадбирда «Манчестер Сити» яримҳимоячиси Александр Зинченко бехосдан кубокни туртиб юборди ва у ерга тушиб кетган эди. Яхшиямки, совринга зиён етмади ва ташкилотчилар кубокни тезда жойига қайтариб қўйишди.

Кейинчалик, «Сити» футболчиси Илкай Гюндоган қулаб тушаётган кубок суратини твиттерга жойлаштириб: «Совринларни тузатадиган жойни ким билади? Дўстим учун сўраяпман» - деган ёзувни қолдирди.

Унинг твитига «Реал» сардори Серхио Рамос жавоб қайтарди.

«Бир иккита жойни биламан, аммо 2011 йилдан бери уларга қўнғироқ қилмаганман. Совринларни ўша йили тушириб бошлаганман, у пайтлари бу ҳали одатга айланмаган эди».

Маълумки, 2011 йилда «Реал» Испания Кубоги билан усти очиқ автобусда айланаётганида, Рамос уни беҳосдан қўлидан тушириб юборган ва соврин автобус ғилдираклари тагида қолган эди.