Трампнинг маслаҳатчиси «ўлаётган» Маккейн устидан кулди

АҚШ президенти Дональд Трампнинг маслаҳатчиси Кэлли Сэдлер «ўлаётган» сенатор Жон Маккейн ҳақида ҳазил қилди ва кўпчиликнинг ғазабини келтириб чиқарди. Бу ҳақда The Hill ёзмоқда.

Нашр манбасининг айтишича, «ҳазил» Жина Хаспелни МРБ раҳбари этиб тайинлаш бўйича ёпиқ йиғилишда айтилган. Сэдлер, хабар берилишича, Маккейннинг фикрига қулоқ тутиш керак эмаслиги, сабаби у «барибир ўлаётгани»ни маълум қилган.

Таъкидланишича, Трампнинг маслаҳатчиси ҳазил қилмоқчи бўлган, бироқ йиғилишда қатнашаётганлар бундай ҳазилни тушунишмади. Шундан сўнг Сэдлер сенаторнинг қизи Меган Маккейнга қўнғироқ қилиб, узр сўраган.

Эслатиб ўтамиз, аввалроқ Маккейн саратон билан яна қанча яшашини билмаслигини айтганди.