“У нима ҳақида гапирганини тушунмадим”: Трамп Макроннинг нутқи ҳақида ҳазил қилди

АҚШ президенти Дональд Трамп Франция етакчиси Эмманюэль Макрон билан учрашувда унинг нима ҳақида гапирганини тушунмаганини айтиб ҳазил қилди, деб хабар қилди РИА Новости.

Трамп ва Макрон Брюсселда бўлиб ўтаётган НАТО саммити доирасида учрашишди. Трамп Макронни дўст деб атади ҳамда Франция ва АҚШ ўртасидаги самарали ҳамкорликни эътироф этди. Ўз навбатида, Макрон АҚШ президентига 2017 йилда Парижда Бастилиянинг олиниш куни байрамидаги учрашувларини француз тилида эслатди.

“Жудаям чиройли, лекин у нима ҳақида гапирганини тушунмадим”, — деди Трамп унга жавобан ва атрофдагиларнинг кулгисига сабаб бўлди. Шундан сўнг Макрон ўз сўзларини Америка президентига инглиз тилида айтди.

Аввалроқ НАТО саммити арафасида Трамп фақатгина альянс бош котиби Йенс Столтенбергга ёқишини айтиб ҳазиллашганди.