Швейцарияда Mercedes ва Porsche сотувлари тўхтатилди

Швейцария ҳукумати дизель моторли Mercedes ва Porsche русумидаги автомобилларни рўйхатдан ўтказишни тўхтатди. Бунга сабаб сифатида уларнинг экологик талабларга жавоб бермаслиги кўрсатилган. Automotive News шу ҳақида хабар берди. 

Тақиқ остига тушган автомобиллар орасида 1,6 литр моторли Mercedes-Benz Vito минивэнлари, шунингдек 3,0 ва 4,2 литр ишчи ҳажмга эга двигателлар билан жиҳозланган Porsche Macan ва Cayenne кроссоверлари номи қайд этилган. 

Рўйхатдан ўтишга тақиқловлар 17 августдан кейин Швейцарияга олиб кирилган автомобилларга тегишли. Бу санага қадар келтирилган машиналарни эксплуатация қилиш мумкин, бироқ уларнинг қувват агрегати модифиакация қилиниши керак бўлади. 

Бу Porsche автомобилларининг рўйхатдан ўтиши тақиқланган биринчи ҳолат эмас. Июнь ойида Германия маркаси Евроиттифоқда кучга кирган янги экологик меъёрларга тўғри келмаган машиналари сотувларини тўхтатишга мажбур бўлгани ҳақида маълум қилинган эди.