Месси – «Барселона»нинг Ла Лигадаги 5000 ва 6000-голлари муаллифи

«Барселона» Испания Примерасининг биринчи турида «Алавес» устидан ишончли ғалабага эришди. «Камп Ноу»да кечган учрашув майдон эгаларининг 3:0 ҳисобидаги ғалабаси билан якунланди.

Ўйиннинг 64-дақиқасида каталонияликлар жамоаси етакчиси Лионель Месси жарима зарбасидан ҳисобни очди. Бу гол «Барселона»нинг Испания чемпионати тарихидаги 6000-голи бўлди. Ўйин охирида Месси яна бир гол уриб, дублни расмийлаштирди.

Қайд этиш керакки, каталонияликлар клубининг Ла Лигадаги 5000-голи ҳам айнан Месси томонидан урилганди. Бу голни ушбу аргентиналик футболчи 2009 йилнинг 1 февралида, Примеранинг 21-турида «Расинг» дарвозасига урганди (2:1). Ўша ўйинда ҳам у дубль қайд этганди.

«Барселона» Примерада 6000 голлик довонни забт этган иккинчи клуб бўлди. «Реал» шу йилнинг февралида Испания чемпионатларидани 6000-голини урганди. Ўшанда Марко Асенсио «Бетис»га қарши ўйинда (5:3), «бланкос»нинг юбилей голига муаллиф бўлганди.

Бунгача «Барселона»нинг юбилей голлари Маркос Аурелио (1000-гол, 1950 йил), Педро Сабалья (2000-гол, 1964 йил), Кини (3000-гол, 1982 йил) ва Гильермо Амор (4000-гол, 1996 йил) каби футболчилар томонидан урилган.