«Рома» «Милан»ни енгди ва ЕЧЛ учун курашда қолди, «Барса» соврин олган кунида ютқазди. Кун ўйинлари

Италия: «Ювентус» ЕЧЛ сари қадам ташлади

Италияда финишда икки асосий масала ҳам долзарб — скудетто учун пойга ва Чемпионлар лигасига сўнгги йўлланма учун кураш.

Италия А Серияси, 37-тур
«Интер» – «Лацио» 2:2
Голлар: Биссек 45+2, Дюмрфрис 79 – Педро 72, 90.
«Интер»: Зоммер. Ачерби. Бастони (Зелински, 90). Биссек. Чалхонўғли (Залевски, 90). Мхитарян (Арнаутович, 90). Барелла. Димарко (Карлос Аугусту, 68). Дюмфрис. Тюрам. Торимий (Корреа, 56).
«Лацио»: Мандас. Романиоли. Хила (Жиго, 90). Нуну Тавареш (Ҳюсай, 65). Марушич. Ровелла. Гендузи. Весино. Диа. Исаксен (Педро, 53). Кастелянос
Огоҳлантиришлар: Чалхонўғли, 38 – Кастелянос, 45. Хила, 61. Романиоли, 79

«Парма» – «Наполи» 0:0
«Парма»: Судзуки. Чиркати. Леони (Айно, 63). Балог. Кейта. Зом. Эрнани (Бернабе, 76). Валери (Левик, 85). Дел Прато. Бонни (Ондрейка, 85). Пелегрино (Джурич, 85)
«Наполи»: Мерет. Ррахмани. Оливера. Спинаццола (Маццокки, 86). Ди Лоренцо. Гилмор (Биллинг, 69). Замбо Ангисса. Мактоминай. Политано (Симеоне, 80). Лукаку (Нгонге, 80). Распадори (Нерес, 69)
Огоҳлантиришлар: Дел Прато, 70 – Ди Лоренцо, 73. Маццокки, 90

«Наполи» ўтган турда ўз уйида «Женоа» билан дуранг ўйнаб қўйганида Антонио Конте жамоасига руҳий босим элементи сифатида кўрилганди. Бир очколик устунлик — жуда кичик, «Парма» эса «Интер»нинг собиқ футболчиси Кристиан Киву бошқарувга келганидан буён нафақат инқироздан чиқа олди — балки фаворитлар учун даҳшатли рақиба айланди. Баҳорда «салибчилар» «Интер» (2:2), «Ювентус» (1:0) ва «Лацио» (2:2) каби рақиблардан очко ололди.

«Наполи»га ҳам ўйин осон кечмади. Бир томондан, Замбо-Ангиссанинг зарбасидан кейин «Парма»ни устун қутқариб қолди. Бошқа томондан — Мерет ҳам жанубликларни муқаррар голдан қутқаришига тўғри келди. Бу вақтда эса Миландаги ўйинда «Интер» ҳам гол ўтказиб юбориши мумкин эди, аммо биринчи бўлим охирида Зоммер яккама-якка вазиятга чиқиб келган Исаксенни тўхтатди. Арбитр томонидан қўшиб берилган дақиқаларда эса жароҳатланган Лаутаро Мартинес йўқлигида ҳимоячи Биссек ҳужумда ўзини кўрсатиб, ҳисобни очди.

«Наполи»нинг зарбалари эса дарвоза тўрига борай демасди. Гоҳ Политанонинг зарбасидан кейин тўп тўсинга борди, гоҳ мезбонлар дарвозабони Мактоминайнинг хавфли зарбасини бартараф этди. Пармадаги ўйинда таблодаги ноллар ўзгармай турганида Миланда ҳақиқий драма кузатилди. Нерадзурриларнинг собиқ футболчиси Весино мезбонлар жарима майдонида ваҳима юзага келтирди ва «Лацио» Педронинг зарбаси билан ҳисобни тенглаштирди. Аммо саккиз дақиқа ўтиб Ҳоқон Чалхонўғлининг жарима зарбасидан узатган тўпни Дюмфрис дарвоза тўрига йўллади.

Аммо бу ҳали якун эмасди. Асосий вақтнинг охирги дақиқасида тўп жарима майдони ичида Биссекнинг қўлига тегди, ҳакам мониторда вазият такрорини кўриб, 11 метрлик нуқтани кўрсатди ва Педро Зоммерга имконият қолдирмади. Симоне Индзагининг собиқ жамоаси ўзи ҳам муҳим очколарни йўқотиши билан бирга, амалда «Интер»нинг ҳам скудетто учун йўлида тўғаноқ бўлди. «Лацио» ҳозирда олтинчи ўринда қолмоқда ва ЕЧЛга йўлланма берувчи тўртинчи ўриндан икки очкога ортда қолмоқда. Бунда нерадзурриларнинг ўзини ҳам айблаш мумкин, ўйинга қўшиб берилган тўртинчи дақиқа ўтиб бораётганида Ачербининг зарбасидан кейин тўп дарвоза тўрига кириб бораётганида офсайддаги Арнаутович унга тегиниб, гол бекор қилинишига сабабчи бўлди.

Бу вақтда эса Пармада ҳакам Давид Нересга қарши ишлатилган фол учун мезбонлар дарвозасига пеналти белгилади. «Наполи» чемпионлик учун муҳим голни уриши мумкин эди, аммо видеотакрорда ҳужум бошланиши вақтида Симеоне томонидан қоидабузарлик қилинганини қайд этди. Энди скудеттога эга чиқиш учун неаполитанликлар сўнгги турда «Каляри»ни мағлуб этиши талаб этилади. Бир очколик фарқ билан таъқиб қилаётган «Интер»ни эса «Комо»га қарши сафар ўйини кутмоқда.

«Ювентус» – «Удинезе» 2:0
Голлар: Гонсалес, 61, Влаҳович 88.
«Ювентус»: Ди Грегорио. Келли. Вейга. Камбьясо (Влахович, 73). Кошта. Локателли. Маккенни (Дуглас Луис, 81). Консейсау (Аджич, 90). Кенан Йилдиз (Мбангула, 90). Гонсалес. Коло Муани (Веа, 73).
«Удинезе»: Окойе. Кабаселе (Джаннетти, 76). Соле. Кристенсен. Саррага. Чельстрем. Камара (Земура, 29). Эхизибуэ. Ловрич (Модесто, 60). Эккеленкамп (Санчес, 76). Дэвис
Огоҳлантиришлар: Камара, 3. Ловрич, 14. Кристенсен, 77

«Рома» – «Милан» 3:1
Голлар: Манчини 3, Паредес 58, Кристанте 87 – Феликс 39
Четлатиш: Ҳименес 21
«Рома»: Свилар. Манчини. Н`Дика. Зеки Челик. Кристанте. Паредес (Ренч, 78). Коне. Анхелинио. Салемакерс (Балданци, 84). Шомуродов (Ал-Шаъровий, 84). Соуле (Гурна-Дуат, 78).
«Милан»: Меньян. Габбиа (Соттиль, 84). Павлович. Томори. Лофтус-Чик (Фофана, 65). Рейндерс. А. Хименес (Йович, 65). Муса. Пулишич (Терраччано, 90). Жоау Феликс (Леау, 66). С. Ҳименес
Огоҳлантиришлар: Манчини, 25. Кристанте, 45. Зеки Челик, 61. Паредес, 63 - А. Хименес, 62. Томори, 90

Ўтган душанба куни «Интер» ва «Наполи» ортидан «Аталанта» ҳам ЕЧЛ йўлланмасини ҳал қилганди. Бергамоликлар «Рома»нинг 19 тур давом этган мағлубиятсиз сериясига барҳам бериб (2:1), римликларнинг мавсумни кучли тўртликда якунлаш имкониятини пасайтириб юборганди. Шу туфайли Клаудио Раниери А сериядаги 500-ўйинига бешинчи ўринда етиб келди.

Элдор Шомуродов бошланғич таркибда тушган ўйинда «бўрилар» тезкор гол уриб, онлайн жадвалда тўртинчи ўринга чиқиб олди, 3-дақиқада Соуле бурчакдан оширган тўпни Манчини дарвоза тўрига йўллади. Биринчи бўлим ўрталарида «Рома» сон жиҳатдан ҳам устунликка эришди, аммо Сантяго Ҳименес четлатилганидан кейин ҳам «Милан» ҳужумкор ўйнашда давом этди ва Алехандро Ҳименес Жоау Феликс февралдан буён илк голини уришига ёрдам берди.

Шу тариқа, танаффус арафасида онлайн жадвалда яна «Ювентус» тўртинчи ўринга қайтди. Иккинчи бўлимда «Рома» иккинчи голни урди ва тўртинчи ўринга кўтарилди, бироз ўтиб туринликлар ҳам ниҳоят «Удинезе» дарвозасини ишғол этиб, ўринни ўзига қайтарди. Нико Гонсалес рақиб жарима майдонида тўпни олиб қўйди ва Кенан Йилдизнинг узатмасидан кейин дарвозабонга ҳеч қандай имконият қолдирмади. Кўп ўтмай Влаҳович ўйин масаласига нуқта қўйди. Туринликлар энди охирги турда Венецияда ғалаба қозониб, ЕЧЛ йўлланмасига эга чиқиши мумкин. «Рома» эса тўртинчи йўлланмага эга чиқиш учун биринчи навбатда сафарда «Торино»ни енгиши ва «Юве» очко йўқотишини кутиши керак бўлади.

Англия: «Ноттингҳэм» курашга қайтди, «Арсенал» иккинчи ўринни кафолатлади

АПЛ, 37-тур
«Вест Ҳэм» — «Ноттингҳэм Форест» 1:2
Голлар: Боуэн (86) — Гиббс-Уайт (11), Миленкович (61). 
«Вест Ҳэм» — Ареоля, Тодибо, Килман, Крессуэлл (Алварес, 59), Цоуфал, Уорд-Проуз (Солер, 59), Родригес (Пакета, 59), Ван-Биссака, Соучек (Фуллкруг, 58), Боуэн, Қуддус (Гиллерме, 79). 
«Ноттингҳэм Форест» — Зелс, Айна, Миленкович, Мурилло, Уилямс, Сангаре (Морато, 83), Андерсон (Ҳадсон-Одои, 83), Домингес (Йейтс, 90+5), Гиббс-Уайт (Данило, 83), Эланга (Жота Силва, 90+5), Вуд.
Огоҳлантиришлар: Цоуфал (45+2), Андерсон (52), Пакета (76), Тодибо (90+1), Мурилло (90+15), Морато (90+15), Солер (90+15), Алварес (90+15).

Яқин вақтларгача учинчи ўринни ҳеч кимга бериб қўйайдигандек кўринган «Ноттингҳэм» қаторасига уч турда ғалаба қозона олмади ва ҳолатини оғирлаштириб қўйди. Бу оралиқда атиги икки очко олган Нуну Эшпириту Санту шогирдлари еттинчи ўринга қулади. ЕЧЛ йўлланмаси учун имконият минималлашди, жамоа фақат сафарда «Вест Ҳэм» устидан қозонилган ғалабадан кейин курашда қолди.

«Ўрмончилар» бунинг учун лондонликлар дарвозабони Ареолдан миннатдор бўлиши керак, у тўпни Гиббс-Уайтнинг оёқларига ташлаб бериб, меҳмонларга гол туҳфа қилди. Футболчи бу голини жамоа форварди Авонийининг футболкасини кўтарган ҳолда нишонлаб, оғир жароҳат олган ва жарроҳлик амалиётидан кейингина сунъий кома ҳолатидан чиқарилган жамоадошини қўллаб-қувватлади.

Кейин эса жамоалар қарама-қарши курсларда ўйинни давом эттиришди. Вуд бир неча дақиқа ичида иккита имкониятдан фойдалана олмади, аввалига унинг зарбаси устунга борди, кейин эса Ареоля у билан дуэлда устун келди. Иккинчи бўлимда Эланганинг жарима зарбасидан кейин тўп Миленкович орқали дарвоза тўрига бориб тушганида эса ҳакам бир неча дақиқа давомида видеотакрорни кўриб чиқиб, офсайд ҳолатидаги бошқа футболчиларнинг вазиятга таъсири даражасини ўрганди. Якунда у «Ноттингҳэм» фойдасига қарор чиқарди, «болғачилар» эса фақат ўйин охирида битта жавоб голини уришди: тўп жарима майдони ичига ташлаб берилганида Морато ҳимояда ишончли ҳаракат қила олмади ва Боуэн ҳаводаги тўпни тўхтатмасдан зарба йўллади. Ўйинга ҳакам томонидан қўшиб берилган 13-дақиқада эса Зелс «Ноттингҳэм» учун ғалабали ҳисобни сақлаб қолди. Энди барчаси сўнгги турда — «ўрмончилар»нинг уйда «Челси»га қарши ўйинида ҳал бўлади.

«Арсенал» – «Нюкасл» 1:0
Гол: Райс 55.
«Арсенал»: Райя. Салиба (Калафьори, 46). Кивер. Льюис-Скелли. Уайт. Партей. Райс. Эдегор (Жоржиньо, 90+3). Мартинелли. Сака (Ҳаверц, 76). Троссар (Тирни, 88)
«Нюкасл»: Поуп. Ботман (Крафт, 64). Бёрн. Шер. Тонали. Гимарайнс. Ливраменто. Мёрфи (Майли, 64). Гордон. Барнс (Уиллок, 76). Уилсон (Осула, 64)
Огоҳлантиришлар: Ҳаверц, 90. Райя, 90. Кивер, 90 - Крафт, 65. Уиллок, 90. Берн, 90

«Эмирейтс»даги ўйиннинг биринчи бўлимида икки дарвозабон — Райя ва Поуп — том маънода ким кўпроқ сейв қилиши бўйича мусобақалашишди. Испаниялик посбон кўпроқ қутқаришига тўғри келди, аммо унинг ҳамкасби мавсум ҳит-парадларига кирадиган сейвни ҳам ижро этди. «Арсенал» бурчак зарбасини ўз услубида ижро этди, Партей бир ярим метр масофадан туриб зарба йўллади, аммо Поуп қўлларини баланд кўтарган ҳолда тўпни қайтариб қолди. «Нюкасл»га ҳужум чизиғида жароҳатдаги Исак йўқлиги сезилди. Яратилган вазиятлардан ушбу швед камида битта гол уриши мумкин эди, «Арсенал»га эса бу мавсумнинг энг ёрқин ўйинчиси Райснинг навбатдаги кучли зарбаси етарли бўлди.

«Канонирлар» рақиб жарима майдони яқинида босим уюштириб, тўпни олиб қўйди, Сака тўпни Эдегорга узатди, у эса жарима майдони чизиғи олдида очилган Райсни тўп билан таъминлади. Ғалабали ҳисобни сақлаб қолган Микел Артета шогирдлари иккинчи ўринни кафолатлади, учинчи ўринда қолган «Нюкасл» эса фақат қўшимча кўрсаткичлар ҳисобига «Челси» ва «Астон Вилла»дан олдинда жойлашган. Учала жамоада ҳам 66 тадан очко бор. Сешанба куни қолдирилган ўйинини ўтказадиган «Манчестер Сити» «Борнмут» устидан ғалаба қозонса, ушбу триони қувиб ўтиши мумкин, бу эса Эдди Ҳау жамоаси ЕЧЛ йўлланмаси учун охирги турда уйда «Эвертон»ни мағлуб этиши зарурлигини англатади.

Испания: «Вилярреал» — Чемпионлар лигасида

«Барселона» — «Виляреал» 2:3
Голлар: Ямал 38, Фермин 45+5 – Перес 4, Камесана 50, Бюкенен 80.
«Барселона»: тер Штеген. Кубарси. Иниго Мартинес. Мартин (Бальде, 46). Гарсия (Форт, 74). Гави (Олмо, 85). Педри (де Йонг, 46). Фермин Лопес. Рафиня. Ямал. Левандовски (Виктор, 74)
«Вилярреал»: Луис Жуниор. Коста. Фойт. Кардона. Пабло Наварро (Камбвала, 64). Парехо (Гей, 58). Комесаня. Пино (Бюкенен, 64). Пепе (Морено, 77). Баэна. Перес (Барри, 46)
Огоҳлантиришлар: Гарсия, 43. Олмо, 86

«Атлетико» — «Бетис» 4:1
Голлар: Алварес 10, 75,  Ле Норманн 45+3, Корреа 90+6 – Форналс 67.
«Атлетико»: Облак. Лангле. Ле Норман. Галан. Лиоренте. де Пауль (Галлахер, 70). Коке. Лино (Молина, 80). Симеоне (Корреа, 80). Сёрлот (Гризманн, 70). Алварес (Витсел, 90+9)
«Бетис»: Адриан. Натан. Менди. Перро. Руибаль (Ортис, 82). Кардозо. Алтимир (Иско, 46). Ло Селсо (Виллиам Карвалю, 82). Аззалзулий (Антони, 46). Пабло Форналс. Бакамбю (Эрнандес, 46).
Огоҳлантиришлар: Молина, 90 - Менди, 89

Ўтган турда муддатидан олдин чемпионликни расмийлаштирган «Барселона» мавсумдаги сўнгги уй ўйинида бўшашди. 4-дақиқада каталонияликларнинг офсайд қопқони тўғри ишламади ва майдон марказидан катта бўшлиққа чиқиб кетган Пепе Айосе Пересни Тер Штеген билан яккама-якка вазиятга чиқариб юборди. Аммо танаффус арафасида кўк-анорранглилар Ямалнинг саъй-ҳаракатлари билан ўйинда бурилиш ясади, у мухлисларга навбатдаги чиройли голини туҳфа этди. 17 ёшли футболчи икки рақибни ортда қолдириб, учинчисининг ортидан ерлатиб зарба йўллади. Ламин яна бир шедевр гол уриши мумкин эди, у жарима майдони ичида икки рақиб орасидан ўтишни уддалади, аммо дарвозабон Жуниор бу сафарги зарбани тўсинга йўналтиришни уддалади. Фақат ҳужум иккинчи темпда давом эттирилди ва Фермин Лопес дарвозабонга ҳеч қандай имконият қолдирмади.

Аммо бу «Вилярреал» мухлисларини қаттиқ хафа қилгани йўқ, чунки параллел ўйинда «Атлетико» ЕЧЛ йўлланмаси учун яна бир даъвогар «Бетис»ни аямаётганди. Пойтахтдаги ўйинда Хулиан Алварес дубл қайд этиб, барча турнирлар доирасидаги голлари сонини 28 тага етказди. «Матрасчилар»да дебют мавсумини бу қадар ёрқин ўтказган футболчи Радамел Фалкао давридан буён бўлмаган (2012/13 йиллар мавсумида 36 гол). Диего Симеоне жамоасининг ғалабаси эса Испаниянинг ЕЧЛдаги вакиллари масаласи муддатидан олдин ҳал бўлишини англатарди. Кейинги мавсумда асосий еврокубокда «катта учлик»дан ташқари «Атлетик» ва «Вилярреал» ўйнайди.

«Сариқ субмариналар» эса турнир жадвалидаги вазиятга қараб ўтиришмади. Иккинчи бўлим Санти Комесаня ҳисобни тенглаштириши билан бошланди, ўйин охирида эса дарвоза қаршисида ёлғиз қолдирилган канадалик Бюкенен ла лигадаги илк голини урди. «Вилярреал» бу билан «Барса»нинг байрамини бироз бузиб қўйди, ўйиндан кейин каталонияликларга чемпионлик кубоги топширилди.

«Севиля» — «Реал» 0:2
Голлар: Мбаппе 75, Беллингҳем 87
«Севиля»: Нюланд. Салас. Баде. Кармона. Санчес (Локонга, 78). Гудель. Агуме. Сусо (Фернандес, 77). Соу (Ману Буэно, 82). Лукебакио (Ромеро, 46). Паскуал (Педроса, 52)
«Реал»: Лунин. Валехо (Г. Гарсия, 66). Рамон. Ф. Гарсия (Себалос, 77). Валверде. Модрич. Тшуамени. Беллингҳэм. Арда Гулер (Васкес, 77). Мбаппе. Эндрик (Мунос, 58)
Огоҳлантириш: Беллингҳэм, 66
Четлатишлар: Баде 12, Ромеро 46.

«Реал» Севилядаги ўйинда аралаш таркибни туширди — дарвозада Лунин, мудофаа марказида Валехо ва ҳужумда Эндрик. Аммо бу қаймоқранглилар 12-дақиқадаёқ Баде четлатилиши эвазига бир киши бўлиб олганидан кейин ҳам гол ура олмаганини изоҳлай олмайди. Чунки Беллингҳэм, Модрич ва Мбаппе каби етакчилар майдонда эди. Иккинчи бўлим бошида эса танаффусда ўйинга қўшилган Ромеро Тшуаменига қарши қўпол ўйнади ва
арбитр видеотакрорни кўриб чиққач, «Севиля» тўққиз киши бўлиб қолди.

Шундан кейин ҳам мадридликлар ҳадеганда гол ура олишмади. Ҳатто гол урмаслик қийин бўлган вазиятларда ҳам тўп дарвозага кирай демасди. Ҳужумлар уюштирилди, Арда Гулер ва Валверде навбатма-навбат зарбалар беришди. Аммо ҳисобни очиш бу сафар ҳам Мбаппега насиб этди, аввалига унинг зарбаси тўсинга борди, кейинги вазиятда эса у мўлжални тўғрироқ олди ва жарима майдони ташқарисидан идеал зарба берди. Килиан бу мавсумда барча турнирлар доирасида жарима майдони ташқарисидан урган голлари сонини еттитага етказиб, бу борада кучли бешлик чемпионатларида Ямал билан биргаликда етакчилик қилмоқда.