Ўзбекистонда яна бир медаль. Магомед Ибрагимовнинг рақиби баҳсни якунлай олмади

Ўзбекистон эркин кураш жамоаси Осиё ўйинларида делегация ҳисобига учинчи медални олиб берди.

97 кг вазн тоифасида иштирок этаётган Магомед Ибрагимов бронза медаль учун баҳсда япониялик Такеши Ямагучини мағлубиятга учратди.

Баҳснинг биринчи раунди Ўзбекистон вакилининг тўлиқ устунлигида ўтди - 6:0. Иккинчи раундда эса япониялик спортчи жиддий жароҳат олди ва баҳсни давом эттира олмади.

Натижада, Ибрагимовга техник ғалаба ёзилди ҳамда у Ўзбекистон ҳисобига яна битта бронза медаль олиб келди.

Бунгача 65 кг вазн тоифасидаги Сирожиддин Ҳасанов бронза, 74 кг вазн тоифасидаги Бекзод Абдураҳмонов олтин медаль олганди.