Тожикистон тоғларида 33 альпинист 2 ҳафтадан бери ёрдам кутмоқда  

Тожикистон тоғларида Россия, МДҲ, Европа давлатлари ва АҚШдан 33 альпинист 2 ҳафтадан кўпроқ вақтдан бери эвакуация қилинишлари учун туроператордан вертолёт юборилишини кутишмоқда. Бу ҳақда туристик гуруҳ вакили Вадим Пипич маълум қилди, деб хабар бермоқда “Интерфакс” ахборот агентлиги.   

Пипичнинг айтишича, муаммолар 12 августда тоғларда 5 кишининг ҳалокати билан якунланган авариядан кейин бошланган. Шу куни туроператор альпинистларни эвакуация қилишга вертолёт жўнатган. Альпинистлардан бир қисми эвакуация қилинган, бироқ Ми-8 вертолётининг авариявий қўниши оқибатида улардан 3 нафари ва 2 экипаж аъзоси ҳалок бўлган. Ҳаммаси бўлиб вертолётда 15 альпинист бўлган. Маълум қилинишича, воқеага мураккаб об-ҳаво шароитлари сабаб бўлган. 

Пипичнинг таъкидлашича, Pamir Peaks туроператори одамларни 25 августда эвакуация қилишга ваъда берган. Бироқ бундай ваъдалар аввал ҳам бир неча марта берилган, бироқ вертолёт 2 ҳафтадан бери жўнатилмаяпти. Пипичнинг маълум қилишича, Помир тоғ тизмасида 4 минг метр баландликдаги лагерда 30 га яқин одам қолмоқда.  Таъкидланишича, кўпчилик альпинистлар ангина, ичбуруғ, қўл-оёқларининг совуқ ейишидан азият чекишмоқда, уларнинг озиқ-овқатлари тугаган. 

Маълум қилинишича, туристик гуруҳ аъзоларининг ҳар бири туроператорга сафар учун 2,5 минг доллардан тўлаган. Бу пул ичига уларни транспортировка қилиш ҳам кирган.