Шотландиядаги фермада тасодифан ўта ноёб «Лэнд Ровер»лар топилди

Шотландиянинг Пиблсшир графлигида фотографлар гуруҳи нодир ва йўқолиб кетган деб ҳисобланувчи Land Rover йўлтанламасларига дуч келишди. Автомобиллар хусусий мулк ҳудудида жойлашган омборда сақланаётган бўлган. Бундан ташқари, Rolls-Royce V12 двигатели ўрнатилган тажрибавий аэродром автомобили ҳам топилган.

Машиналардан бири Land Rover Series IIA Lightweight ҳарбий автомобили бўлиб, 1968 йилда жами 1500-2000 дона ишлаб чиқарилган.  
Иккинчи топилма Land Rover Defender 110 бўлди. Ҳужжатларга кўра, у синов автомобили бўлиб, модель конверсияси ва турли вазифаларни бажариш учун шассининг мустаҳкамлиги текшириб кўрилган.

Сўнгги автомобиль эса SRV1 аэродром автомобилидир. Мазкур тажрибавий машина Rolls-Royce Meteor двигатели билан жиҳозланган. Бундай двигателлар 1964 йилгача Британия танкларига ўрнатилган. 27 литрли SRV1 мотори 608 от кучига эга бўлган.