Ассанж ҳақида янги маълумот: Эквадор уни Москвага жўнатиб юбормоқчи бўлган

Эквадор ҳукумати 2017 йилда WikiLeaks асосчиси Жулиан Ассанжни Москвадаги элчихонага дипломатик лавозимга тайинлашни режалаштирган, бироқ Британиянинг унга дипломатик дахлсизлик тақдим этишдан бош тортгани туфайли бу қарор бекор қилинди. Бу ҳақда Reuters тегишли ҳужжатларга асосан хабар бермоқда.

Ассанж олти йилдан бери Эквадорнинг Лондондаги элчихонасида яшаб келмоқда. 2011 йилда Британия ҳукумати уни Швецияга жўнатиб юбориш ҳақида қарор қабул қилди, у бу давлатда номусга тегишда айбланмоқда. Шу тариқа, WikiLeaks асосчиси Эквадор дипломатик ваколатхонаси ҳудудини тарк эта олмайди, сабаби Лондон полицияси томонидан дарҳол қўлга олинади.

Агентлик танишиб чиққан ҳужжатда айтилишича, ўтган йилнинг 19 декабрь куни Эквадор ҳукумати Ассанжга «алоҳида мақом» тақдим этди, бу унга Эквадорнинг Россиядаги элчихонасида ишлаш имконини берган.

Бироқ, Британия ТИВ орадан икки кун ўтиб Ассанжнинг дипломат мақомини тан олмаслиги ҳақида жавоб қайтарди. Шундан сўнг Эквадор ҳукумати ўз қарорини ўзгартирди, дея аниқлик киритган агентлик.

Эслатиб ўтамиз, аввалроқ Ассанж бир қарорга келгани, у Эквадорнинг Лондондаги элчихонасини тарк этмоқчи экани хабар қилинганди.