Исроилда тезюрар "самовий поезд" йўлга қўйилади

Исроилнинг Нетания шаҳрида "самовий поезд" (Skytrain) деб номланган магнитоплан қурилади, у ҳаво транспортига рақобатчи бўлиши мумкин, деб хабар берди mynet интернет-нашри.

Магнитоплан икки-тўрт кишига мўлжалланган капсула шаклидаги "маршрут такси" бўлиб, ердан 25 метр баландликда ҳаракатланади. Йўловчилар бекатларга лифтлар ёрдамида кўтарилади.

"У атроф-муҳитни ифлослантирмайдиган магнит двигатель ёрдамида ҳаракатланади. Skytrain йўналишлари ердаги транспорт йўллари устида барпо этилади ва кейинчалик шаҳарнинг исталган нуқтасига бориш мумкин бўлади", — деди шаҳар мэри вазифасини бажарувчи Эли Даляла.

Узунлиги 650 метр бўлган дастлабки синов йўли шаҳардаги туманлардан бирини темир йўл вокзали билан боғлайди.  Магнитоплан электромагнит майдон кучи билан тутиб турилади. У ҳаракатланиш вақтида рельсга тегмайди ва тезлиги соатига 300 километрдан ошиши мумкин.

Мэриянинг ҳисоб-китобига кўра, дастлабки ҳаракатланиш участкаси қурилиши учун 6 миллион доллар атрофида маблағ сарфланади.