Хавфли объектларнинг саноат хавфсизлиги қачон экспертизадан ўтказилади?

Вазирлар Маҳкамасининг 2.10.2018 йилдаги 784-сон қарори билан буюртмачининг ариза бериш ва хулоса олиш тартиби, экспертизани амалга ошириш босқичлари, муддатлари ва ҳолатлари белгиланди, деб ёзмоқда Norma.

Эслатиб ўтамиз, саноат хавфсизлиги соҳасида давлат томонидан тартибга солиш Вазирлар Маҳкамаси, «Саноатгеоконтехназорат» ДИ, шунингдек айрим ваколатларга эга бўлган бошқа давлат органлари томонидан амалга оширилади.
 
Саноат хавфсизлигини экспертизадан ўтказиш – шундай тартибга солиш турларидан бири. Хавфли ишлаб чиқариш объектини (бундан кейин – ХИО) қуриш, кенгайтириш, қайта қуриш, техник жиҳатдан қайта жиҳозлаш, консервациялаш ва тугатишни амалга ошириш учун экспертизанинг ижобий хулосаси бўлиши зарур. Хавфли тоифага кирувчи объектлар рўйхати «Хавфли ишлаб чиқариш объектларининг саноат хавфсизлиги тўғрисида»ги Қонуннинг 4-моддасида белгиланган. 
 
Қуйидагилар саноат хавфсизлиги экспертизасидан ўтказилади:

• ХИОни қуриш, кенгайтириш, қайта қуриш, техник қайта жиҳозлаш, консервациялаш ва тугатишга доир лойиҳа ҳужжатлари;
• ХИОнинг саноат хавфсизлиги декларациялари.  
 
Шунингдек ХИОда техник қурилмалар, бино ва иншоотлар қандай ҳолларда экспертизадан ўтказилиши белгиланди.

Буюртмачи экспертизани амалга ошириш учун эксперт ташкилотига белгиланган шаклдаги буюртманомани бевосита, унинг олингани тўғрисидаги билдиришнома билан бирга почта орқали ёхуд электрон шаклда (ЭРИ билан тасдиқлаган ҳолда) тақдим этади. Буюртманомага зарур ҳужжатлар пакети (уларнинг рўйхати ҳужжатга иловага кўрсатилган) илова қилинади. 

Экспертизани буюртмачи билан шартнома асосида аккредитацияланган эксперт ташкилотлари амалга оширадилар. Экспертиза натижаларига кўра объект саноат хавфсизлиги талабларига мувофиқлиги ёки номувофиқлиги тўғрисида хулоса берилади.

Экспертизани ўтказиш муддати экспертиза объектининг мураккаблигига қараб белгиланади, бироқ зарур бўлган материаллар ва ҳужжатлар тўплами олинган кундан бошлаб 3 ойдан ошмаслиги керак.

Экспертизадан ўтказиш қуйидаги босқичлардан иборат:

• экспертизани ўтказиш учун аризани қабул қилиш;
• ҳужжатларни дастлабки баҳолаш ҳамда экспертизани амалга ошириш учун шартнома тузиш;
• экспертиза объектининг унга қўйиладиган саноат хавфсизлиги талабларига мувофиқлигини баҳолаш;
• экспертиза хулосасини расмийлаштириш ва бериш.
 
Кейинги ҳар бир босқич аввалгисида ижобий натижаларга эришилганда ўтказилади.

Экспертизани ўтказишда номувофиқликлар ва камчиликлар аниқланган ҳолларда эксперт бир кун давомида протоколни расмийлаштиради. Буюртмачи протоколни олгандан сўнг унда кўрсатилган муддатларда аниқланган номувофиқликларни бартараф этиши ва белгиланган шаклдаги натижаларни эксперт ташкилотига юбориши керак.
 
Салбий экспертиза хулосаси қуйидаги ҳолларда расмийлаштирилади:

• буюртмачи томонидан номувофиқликларни бартараф этиш тадбирлари етарлича ўтказилмаганда ёки уларнинг натижалари келишилган муддатларда тақдим этилмаганда;
• тақдим этилган ҳужжатларда бузиб кўрсатилган ёки ёлғон маълумотлар борлиги аниқланса;
• ўтказилган текшириш ва техник диагностиканинг асосланган салбий натижалари олинганда;
• экспертиза объекти саноат хавфсизлиги талабларига мос келмаса.  
 
Хулосада кўрсатилган барча номувофиқликлар ва камчиликларни бартараф этгандан кейин буюртмачи экспертизани ўтказиш учун такроран ариза бериши мумкин.
 
Экспертиза хулосалари Низомга иловада кўрсатилган муддатларга берилади. Қурилиши тугалланган объект фойдаланишга қабул қилингандан кейин экспертиза доирасида ХИО идентификацияланади.
 
ХИО саноат хавфсизлигини экспертизадан ўтказиш талабини бузганлик учун МЖТКнинг 97-моддаси бўйича маъмурий жавобгарлик белгиланган. 

Ҳужжат 3.10.2018 йилдан кучга кирди.