Трамп АҚШнинг Туркиядаги элчихонасини ёпмоқчи бўлган – ОАВ  

АҚШ президенти Дональд Трамп Туркияда ҳибсда ушлаб турилган америкалик пастор Эндрю Брансоннинг озод этилмаётгани сабабли Туркиядан барча дипломатларни қайтариб олишни режалаштирган. Бу ҳақда Оқ уй ва давлат департаментидаги манбаларга иқтибос келтирган ҳолда ABC News телеканали маълум қилди.  

Маълум қилинишича, Трамп Брансон билан боғлиқ вазият сабабли Туркия президенти Ражаб Тоййиб Эрдўғандан жуда дарғазаб бўлган. Жумладан, у АҚШнинг Туркиядаги элчихонаси ва барча димломатик ваколатхоналарининг ёпилиши режасини тузиб чиқиш топшириғини берган.

Таъкидланишича, Трампнинг атрофидагилар унинг бу ташаббусини турлича қабул қилишган. Хусусан, Оқ уй аппарати раҳбари Жон Келли Туркиядан фақатгина ёрдамчи персонални олиб чиқишни таклиф қилган бўлса, Трампнинг маслаҳатчиси Жон Болтон президентнинг ташаббусини тўлиқ қўллаб-қувватлашини айтган. 

Трампни икки давлат ўртасидаги муносабатларга тузатиб бўлмас зарба бериши мумкин бўлган бу фикридан АҚШ давлат котиби Майк Помпео қайтара олган.

Шу билан бирга АҚШ давлат департаментида Трамп бундай ташаббусни билдиргани ҳақидаги ахборот рад этилган, Оқ уйда эса унга изоҳ беришдан бош тортилган.

Брансон 2016 йилда турк идоралари томонидан давлат тўнтарувига уриниш айблови билан хибсга олинган. 12 октябрда Туркиянинг Измир шаҳри суди Брансонни 3 йил 1,5 ойлик қамоқ жазосига маҳкум қилган, бироқ у ҳибсда ушлаб турилган вақтни ҳисобга олиб, уни озод этишга қарор қилган.