Трамп чегарада зарурат бўлса муҳожирларни ўққа тутишга рухсат берганини айтди

АҚШ президенти Дональд Трамп журналистларга Мексика билан чегарадаги ҳарбийларга у ерга келган муҳожирларни ўққа тутишга рухсат берганини маълум қилди.

Трампнинг айтишича, ҳарбийларга “зарурат пайдо бўлса, отишга рухсат берган”.

“Умид қиламанки, улар буни қилишларига тўғри келмайди. Менда бошқа танлов йўқ, чунки улар шафқатсиз одамларга тўқнаш келмоқдалар”, деб айтган Трамп.

Трамп Марказий Америкадан АҚШга келаётган муҳожирлардан ҳимояланиш мақсадида чегарага бир неча минг ҳарбийни жўнатганди. Таъкидланишича, АҚШ мудофаа вазирлигига “мудофаа вазири зарур деб ҳисоблаган ҳаракатларни амалга оширишга” кўрсатма берилган.

Жумладан, ҳарбийларга  “куч қўллаш, оломонни назорат қилиш бўйича чоралар кўриш, вақтинчалик ҳибсга олиш ва қисқа тинтувлар ўтказишга” рухсат берилган.

Ноябрь бошида Трамп ҳарбийлар тошлар отадиган муҳожирларни ўққа тутмасликларини айтганди. У шу билан бирга бундай йўл билан ҳарбийларга ҳужум қиладиган муҳожирлар ҳарбийлар сифатида баҳоланишларини айтган.