Бувайда “Мега парк”ида водийдаги энг баланд чархпалак аттракциони иш бошлади

Юртда байрам шукуҳи кезиб юрган айни кунларда Фарғона вилояти, Бувайда туманининг маркази Янгиқўрғон шаҳарчасидаги “MEGA PARK” маданият ва истироҳат боғи аҳоли билан гавжум.

“MEGA PARK”да куни кеча водийда энг баланд бўлган чархпалак аттракциони қуриб битказилиб, истироҳат боғига ташриф буюрган меҳмонлар учун хизмат кўрсата бошлади.

“Хитой давлатидан келтирилиб, мутахассислар томонидан қуриб битказилган чархпалак аттракционнинг баландлиги 52 метрни ташкил этиб, водийда энг катта ва баланди ҳисобланади. Тошкентда “Локомотив” боғидагина бизнинг қурилмамиздан “бўйдор” чархпалак мавжуд”, дейди “MEGA PARK” раҳбари Муйдинжон Ғафуров.

52 метрлик маҳобатли чархпалак сўнгги технология ютуқлари асосида қурилган бўлиб, жуда чиройли ва кўркам. Оқшом пайти ундаги турли ранглардан ташкил топган чироқлар ёниб, истироҳат боғига янада чирой қўшиб турибди.