Тинч океанида кемадаги ёнғин оқибатида 4 денгизчи ҳалок бўлди

Тинч океанида автомобиллар ташувчи кемада чиққан ёнғин оқибатида 4 денгизчи ҳалок бўлди ва бир нафари бедарак йўқолди. Таъкидланишича, кема ёнишда давом этмоқда. Бу ҳақда Seatrade Maritime News нашри хабар қилди.   

Япониядан Гавайи оролларига йўл олаётган, Панама байроғи остида сузувчи Sincerity Ace кемасида 1 январда Гавайининг Оаху оролидан 3,5 минг километр узоқликда ёнғин чиққан. 200 метрлик кеманинг экипажи 21 кишидан иборат бўлган.

Фалокат жойига 5 та тижорий кема ва АҚШ соҳилбўйи қўриқлаш хизмати самолёти йўл олган. Улар 16 кишини қутқаришга муваффақ бўлишган. Қутқарувчилар сигналларга жавоб бермаган яна 4 денгизчини аниқлашган. Уларнинг ҳалок бўлгани тахмин қилинмоқда. Бедарак йўқолган деб ҳисобланган бир кишининг қидирилиши тўхтатилган.  

Кеманинг ўзи ёнишда давом этмоқда. Унинг япониялик эгаси ҳалок бўлган денгизчиларнинг жасадини олиб кетиш учун бир неча кундан кейин воқеа жойига етиб борадиган бир неча шатакчи кемани ижарага олган.