Фото: АҚШга аномал совуқлар ва қутб бўронлари кириб келди

Февраль ойи бошида АҚШда аномал совуқлар кузатилмоқда, метеорологлар қутб бўронлари кириб келиши муносабати билан айрим жойларда ҳарорат Цельсий бўйича 53 даражагача тушиб кетиши мумкинлигини тахмин қилишмоқда.

Айова штати ҳукумати аҳолидан имкон қадар чуқур нафас олмаслик ва кўчада гаплашмасликни тавсия қилмоқда.

Ўрта Ғарбда жойлашган Висконсин, Мичиган ва Иллинойсда фавқулодда ҳолат эълон қилинган. Нисбатан жануброқда жойлашган Алабама ва Миссисипида ҳам шундай эҳтимол мавжуд. Бу ҳудудларда кучли қор бўронлари кутилмоқда.

Ҳафта бошида Чикаго Антарктидадан совуқроқ бўлиши мумкин.

АҚШ президенти Дональд Трамп ўз твиттерида ҳазиломуз тарзда бошқаларга керак бўлмаган «глобал исиш» айни вақтда америкаликларга кераклиги ҳақида ёзди.

«Глобал исиш билан нима бўлди. Тезроқ қайт, сен бизга кераксан?», деган у.

Метеорологлар фикрича, кескин совиш Шимолий қутбда Африка шимолидан иссиқ ҳаво оқими бориши ортидан келиб чиққан. Бу оқим таъсирида совуқ ҳаво оқими жанубга силжиган.

Етакчи олимларнинг ҳисоблашича, инсон фаолияти оқибатида юзага келган глобал исиш туфайли қишлар аввалгидан ҳам қаттиқроқ бўлади.

Кескин совиш нималарга олиб келиши мумкин?

Чикаго полицияси маълумотига кўра, совуқ оқибатида бир неча талончилик ҳолатлари кузатилган. Қуролли шахслар дўконлардан нархи 1100 доллар турадиган, Canada Goose фирмаси томонидан ишлаб чиқарилган момиқ кийимларни талаб қилишган.

«Ҳамилтон» мюзикли учун чипталар эса одатдаги нархидан икки баробар арзонга - 70 долларга сотилмоқда. Чунки, одамлар кўчага чиқишни исташмаяпти.

Ўрта Ғарбдаги штатларда минглаб мактаблар ва бошқа муассасалар ёпилган.

Баъзи шаҳарларда уйсизлар учун вақтинчалик исиниш хоналари очилган.