Мадурога Россиядаги дўстлари ёнига жўнаб кетиш таклиф қилинди

Венесуэла президенти Николас Мадуро мамлакатни тарк этиши ва ҳокимиятни вақтинчалик ҳукуматга топшириши керак. Бу ҳақда АҚШнинг Венесуэла бўйича махсус вакили Эллиот Абрамс маълум қилди, дея хабар беради The Washington Post.

Унинг сўзларига кўра, Вашингтон Мадурога аниқ бир давлатга боришни тавсия қилмаяпти. Шу билан бирга, Абрамснинг эслатишича, венесуэлаликнинг Куба ва Россияда «дўстлари» бор. Шунингдек, махсус вакилнинг журналистларга хабар беришича, президентни лавозимидан кетишга рози бўлган тақдирда қабул қилишга тайёр бўлган бошқа давлатлар ҳам бор.

Бундан ташқари, Абрамснинг сўзларига кўра, АҚШ Конституцион ассамблея - Мадуро томонидан ташкил этилган ва уни қўллаб-қувватловчи қонунчилик органининг қатор аъзоларидан визаларни қайтиб олди. Уларнинг исми ошкор этилмаяпти.

Эллиот Абрамс АҚШ Венесуэла мухолифатининг етакчиси ва парламент спикери Хуан Гуайдони республика муваққат президенти сифатида тан олганидан сўнг махсус вакилга айланди. 

Эслатиб ўтамиз, аввалроқ Помпео Венесуэлага Россия ва Кубадан мустақил бўлишни тилаганди.