«Бунёдкор» уни кечиришни сўраган. ЎФА Бабаяннинг қайтиши юзасидан изоҳ берди

Ўзбекистон футбол ассоциацияси Самвел Бабаян Тошкентнинг «Локомотив» футбол клубида иш бошлаши юзасидан изоҳ берди.

«Самвел Бабаян Ўзбекистон миллий терма жамоаси ЖЧ-2018 йўлланмасини қўлга кирита олмаганидан сўнг истеъфога чиқарилганди. Кейинроқ ташкилот Самвел Бабаяннинг бош жамоадаги фаолиятини алоҳида ўрганиб чиқиш талаб этилган ўн мингдан зиёд мактубни Ўзбекистон Республикаси Президентининг портали орқали қабул қилиб олди. Айнан мана шу сўровларга асосан 2018 йилнинг 15 январь куни Самвел Бабаянга нисбатан Ўзбекистон футбол ассоциацияси иш очди ҳамда мазкур иш якунига қадар ЎФА Ижроқўми мураббийни футболдан четлатди.

Ўрганишлар Самвел Бабаян миллий терма жамоадан ўз манфаатлари йўлида фойдаланганди деган хулосага олиб келганди. Шунинг ўзиёқ унинг учун терма жамоалар эшикларини ёпиш учун етарли бўлди. Бироқ кейинчалик ЎФА Ижроқўмига «Бунёдкор» футбол клуби номидан билдирги тақдим этилиб, Бабаяндан дисквалификацияни олиб ташлаш сўралган.

«Бунёдкор» футбол клуби С.Бабаянга шахсий кафил бўлиш ташаббусини билдиради ва унга қўлланилган интизомий чорани енгиллаштиришни сўрайди. Зеро сўнгги вақтларда давлат раҳбарининг шахсан ўзи билиб-билмай айбли қилмиш қилган ва ўз айбидан чуқур пушаймон бўлган шахсларни афв этмоқда. Ўз навбатида айбини тан олган ва уни ювиш учун меҳнат қилишга тайёр турган шахсларга нисбатан инсонпарварлик принципини қўллаган ҳолда ёрдам қўлини чўзиш зарур деб ҳисоблаймиз», — дейилади  ёзилган билдиргида.

ЎФА Ижроқўми аъзолари мазкур хатни бир овоздан ёқлади. Шу тариқа, Ўзбекистон футбол ассоциацияси томонидан очилган иш 2018 йилнинг 1 февраль куни ёпилди ҳамда Самвел Бабаяннинг дисквалификацияси бекор қилинди.

Самвел Бабаян термада фаолият олиб борган даврда йўл қўйилган камчиликлар, унинг термага бош мураббий этиб тайинланиши борасидаги қарорнинг узвий давомидир. Бу ҳолат Ўзбекистон футбол ассоциациясига хулоса ўрнида хизмат қилиб, миллий терма жамоа бош мураббийи жавоб бериши керак бўлган аниқ талаблар ишлаб чиқилиши вазифа сифатида ЎФА Терма жамоалар бўлимига топширилди. Унга кўра, миллий терма жамоани кейинги ўринларда Европа ва Лотин Америкаси футболи билан яхши таниш бўлган, улардаги устун жиҳатларни ўзбекистонлик футболчиларга ўргата олиш салоҳиятига эга бўлган, шунингдек, фаолияти давомида кўзга кўринарли ютуқларни қўлга киритган мутахассис бошқариши керак эди. ЎФА шундан келиб чиққан ҳолда миллий терма жамоага таниқлик аргентиналик мутахассис Эктор Куперни олиб келди.

ЎФА бундан буён Самвел Бабаян Ўзбекистоннинг ҳеч қайси терма жамоасида фаолият юритишига йўл қўймайди. Қўшимчасига, кейинги фаолиятини Самвел Бабаянсиз тасаввур қила олмаган «Локомотив» футбол клубининг қарорига ҳам қаршилик кўрсатмайди», дейилади ЎФА хабарида.

Самвел Бабаян асосан «Пахтакор» клубидаги ва Ўзбекистон терма жамоасидаги фаолияти орқали кенг жамоатчиликка танилган. 2014 йилда у «Пахтакор» бош мураббийи сифатида Ўзбекистон чемпиони бўлган, 2014 ва 2015 йилларда Ўзбекистоннинг энг яхши мураббийи деб топилган. 2017 йилда миллий терма жамоа билан ЖЧ-2018 йўлланмасини қўлга киритолмаган эди.

2018 йил январь ойида Ўзбекистон Футбол Ассоциацияси Самвел Бабаянни «Пахтакор» клуби футболчилари шартномаси билан боғлиқ қаллоблиги учун футболдан умрбод четлатган эди. Шундан сўнг у Латвиянинг «Спартак» клубида бош мураббий ва техник директор бўлиб ишлади.

Қайд этиш жоизки, Ўзбекистон футбол ассоциацияси ўтган бир йил давомида Самвел Бабаяндан дисквалификация олиб ташлангани ҳақида ҳеч қандай қарорни эълон қилмаганди.