Швецияда 90 киши иштирокида оммавий жанжал чиқди

Швециянинг Нючёпинг шаҳри яқинида 90 киши иштирокида оммавий жанжал чиқди. Бу ҳақда Dagens Nyheter нашри хабар берди. 

Полиция вакили Моника Бергстрёмнинг айтишича, воқеа E4 трассасидаги автотураргоҳда юз берган. У ерда ичида 30 киши бўлган автобус тўхтаган. Шундан кейин автотураргоҳда яна 60 киши пайдо бўлган ва улар ҳамда автобусдаги одамлар ўртасида жанжал бошланган. Одамлар бир-бирига тошлар ота бошлашган. Воқеа оқибатида камида 2 киши жароҳат олган, улар шифохонага етказилган.

“Айни вақтда қўлга олинганлар йўқ. Полиция гувоҳларни сўроқ қилмоқда”, деб маълум қилган полиция вакили.  

Полициянинг фикрича, жанжалга икки гуруҳ ўртасидаги низо сабаб бўлган. Айни вақтда жанжалнинг бевосита сабабчилари қидирилмоқда.