Гризманн 120 миллион евро эвазига «Барселона»га ўтади

«Атлетико» ҳужумчиси Антуан Гризманн 1 июлдан кейин «Барселона» билан шартнома имзолаши кутилмоқда. Айни шу санадан бошлаб унинг шартномасида белгиланган бадал пули миқдори 200 миллион евродан 120 миллион еврога тушиши тўғрисидаги банд кучга киради.

The Telegraph нашри маълумотига кўра, франциялик футболчи билан битим шартлари икки ой олдин келишиб бўлинган.

Аввалроқ «Барса» президенти Хосеп Мария Бартомеу бу миш-мишларни рад этганди.

«У билан алоқага чиқмаганимиз ҳақида бир неча маротаба гапирдик. Ҳеч қандай музокара ўтказилмаяпти.

Яқин кунларда ва келгуси ҳафталарда бозорда бўлаётган ўзгаришларни кузатиб борамиз», – деганди Бартомеу RAC1 радиоси эфирида.

Эслатиб ўтамиз, май ойида Гризманн «Атлетико»дан кетишини маълум қилган, аммо янги клубига аниқлик киритмаган эди.

Бундан аввалроқ ушбу футболчига «ПСЖ» ва «Манчестер Юнайтед» каби клублар ҳам даъвогарлиги ҳақида хабарлар тарқалганди.