БААда озиқ-овқат маҳсулотлари бўёқлар билан белгиланади

БААда озиқ-овқат маҳсулотларининг уларнинг озиқавий қийматига кўра белгилаш бўйича умуммиллий дастур йўлга қўйилди. БАА ҳукумати томонидан тасдиқланган дастурга асосан, озиқ-овқат маҳсулотлари улардаги ёғ, шакар ва туз миқдорига кўра уч рангда белгиланиб, истеъмолчиларга қуйидагилар ҳақида маълумот беради:

қизил ранг – кўп истеъмол қилмаслик тавсия қилинади;
зарғалдоқ – ўртамиёна истеъмол қилиш тавсия қилинади;
яшил – мунтазам истеъмол қилиш тавсия қилинади.

Ҳозирча дастур ишлаб чиқарувчилар учун мажбурий ҳисобланмайди, бироқ 2022 йил январидан қоидаларга қатъий риоя қилиш жорий қилинади. Дастур консерваланган қуюқ ва суюқ озиқ-овқат маҳсулотларига татбиқ қилинади. Мевалар, сабзавотлар, гўшт ва балиқ белгиланмайди.

Мамлакатнинг озиқ-овқат хавфсизлиги вазири Марям бинт Муҳаммад Ал-Моҳирийнинг таъкидлашича, бу дастур саломатлик учун зарарли маҳсулотлар истеъмолини 30 фоизга камайтиришга қаратилган миллий стратегияни қўллаб-қувватлайди. 

Унинг таъкидлашича, овқатланишдаги зарарли одатлар оқибатида юзага келадиган касалликлар мамлакат иқтисодиётига ҳар йили 55 млн дирҳамга (15 млн доллар) тушади.