Футболчилар дардини кимга айтади? Ўзбекистон U23 жамоаси шифокори билан суҳбат

Суҳбатдошимиз Хитойдаги Осиё чемпионати финалидан аввал футболчиларни қандай таом билан сийлашганини гапириб берди

Ўзбекистон U23 жамоаси Таиланддаги Осиё чемпионатида иштирокини давом эттирмоқда. Kun.uz мухбирлари мусобақадаги футболчиларимизнинг иштирокини имкон қадар ёритмоқда. Навбатдаги суҳбатдошимиз жамоанинг муҳим инсонларидан бири.

Футбол деганда кўпчилик футболчи ва мураббий каби одамлар кўзига кўринадиган юлдузларни билади. Аммо футболда кўзга кўринмайдиган баъзи одамлар ҳам борки, улар жамоа натижасига бевосита таъсир қилади. Футболчилар жони оғриганда кимга мурожаат қилиши, узоқ мамлакатларда қандай овқатлар ейиши ҳақида Ўзбекистон U23 жамоаси шифокори Алишер Орипов билан суҳбатлашдик.

«Футболга ўғлим сабаб кириб келганман»

Суҳбатдошимизнинг айтишича, 11 йилдан буён Ўзбекистоннинг турли ёшдаги футболчиларини даволаб келади. Алишер Орипов футболга ўғли сабаб кириб келганини айтди: «2007 йилдан буён футболчиларни даволаш билан шуғулланаман. Футболга ўғлим сабаб кириб келганман. У футболчи эди, кейинчалик бошқа соҳага ўтиб кетди. 2011 йилдан буён Ўзбекистоннинг турли ёшдаги жамоаларида ишлаб келаман».

«Футбочилар дардини аввало бизга айтади»

Алишер Ориповнинг айтишича, футболчилар бетоб бўлиб қолса, дардини аввал уларга айтади. Суҳбатдошимиз айниқса олис сафарларда футболчининг энг яқин инсони шифокор бўлади: «Футболчилар биз билан жуда яқин бўлишади. Айниқса бошқа мамлакатларда улар учун ҳам отаси, ҳам акаси бўламиз. Улар нимадир содир бўлса, аввал бизга айтишади».

«Майдонда рақиб футболчисига ҳам ёрдам берамиз»

Жамоамиз шифокорининг айтишича, ўйин давомида рақиб футболчиларига ҳам ёрдам беришга тўғри келган. Бу шифокорнинг вазифаси дейди Алишер ака: «Жуда кўп мусобақаларда қатнашганмиз ва уларнинг ҳар бирида эсда қоларли воқеалар бўлади. Ўтган галги Осиё чемпионатида Уммон билан бир гуруҳда эдик. Ўшанда уммонлик футболчини текшириб берганман. Ироқлик, БААлик футболчиларга ёрдам берганимни ҳам эслай оламан. Бошқа жамоа шифокорлари билан мусобақаларда кўп учрашиб, таниш бўлиб қолганмиз, шу боис докторлар бир-биридан ёрдам сўраб туради. Ҳиндистонда бўлган вақтимиз Яманнинг мураббийини киргизишмаган экан, уларга ёрдам берганмиз. Эсимдан чиқмайди, «руссо дўхтири» деб келишарди.

Ўйин вақтида икки футболчи йиқилса, биз унга яқин бўлсак, рақиб футболчисига ҳам ёрдам берамиз. ОФК футболчи хушидан кетса, ҳакамдан ҳам сўрамай футболчига ёрдам бергани майдонга тушишга рухсат берган. Рақиб футболчиси бўлса ҳам, сиз унга яқинроқ бўлсангиз, тушиб, ёрдам беришингиз керак. ОФК биз учун ҳам йиғинлар ўтказиб, тушунтиришлар олиб боради. Ҳар бир мусобақа олдидан мезбон мамлакатдан масъул шифокорлар ҳам бўлади.

Кеча ҳам олдимизга ОФК шифокорлари келиб кетишди. Улар ҳар қандай ёрдам беришга тайёр. ОФКдан фавқулотда ҳолатлардагина ёрдам сўраймиз, қолган вазиятларда ўзимиз амаллаймиз. ОФКдан бир нарсани доим айтишади, бу мусобақада ҳамма битта оила, ҳамма бир-бирига ёрдам бериши керак».

«Азиз Ғаниев ўзининг энг яхши ҳолатига чиқиб бормоқда»

Жамоа шифокоридан U23 етакчиси Азиз Ғаниевнинг саломатлиги ҳақида сўрадик. Суҳбатдошимиз Азиз ўзининг энг яхши формасига чиқиб бораётганини айтди: «Азиз Ғаниев Японияда операция қилинганида ҳам доимий алоқада бўлиб турганмиз. Азизнинг саломатлигидан шикояти йўқ, у ўзининг энг яхши формасига чиқиб бормоқда».

Футболчи жароҳатини яширадими?

Суҳбатдошимизнинг айтишича, футболчилар ҳар қанча майдонга тушишни хоҳламасин жароҳат олганини яшира олмайди. Бу машғулот вақтида билинади: «Албатта, ҳамма футболчи доим майдонга тушишни хоҳлайди, айниқса Осиё чемпионати каби йирик мусобақаларда. Чунки уларнинг ўйинини камида бутун Ўзбекистон кўриб туради. Аммо футболчи жароҳатини яшира олмайди. Касални яширсанг, иситмаси ошкор қилади: мураббийлар футболчини югуришидан билиб олади».

«Мьянмага борганимизда кўз касаллиги эпидемияси тарқалганди»

Футболчилар бошқа мамлакатларга борганида худди улар каби шифокорлар ҳам мусобақага тайёрланишади. Масалан, у мамлакатда қандайдир касаллик тарқалган бўлиши мумкин: «Ҳар бир мусобақага боришимиздан аввал ОФК, ФИФАдан шифокорлар учун махсус тавсиялар юборилади. Яъни, бизни ўша мамлакатда нима кутаётганини билиб борамиз. Масалан, 2015 йил Мьянмада 1995/96 йилда туғилган футболчилар ўртасида Осиё чемпионати бўлиб ўтганди. Ўшанда Мьянмада кўз касаллиги эпидемияси тарқалганди. Боришдан аввал кўзга томизадиган махсус дорилар билан тайёрланиб борганмиз».

Футболчилар қандай овқатланади?

Кўпчилик мухлислар футболчиларнинг қандай таомлар истеъмол қилиши билан қизиқади. Масалан, Таиландда биз одатланмаган ошхона бўлгани сабаб футболчилар овқатланишда муаммога учраши мумкин, аммо ФИФА ва ОФК бу нарсаларнинг ғамини еб қўйган бўлади: «Мусобақадан олдин ОФК жамоаларга махсус меню таклиф қилади. Ундаги таомлар махсус евростандарт бўйича бўлади. Аммо футболчи узоқ вақт ўзи ўрганган таомни емаса, бу унинг кайфиятига салбий таъсир қилади. Шу боис четга чиққанда имкон қадар футболчиларга миллий таомларимизни тайёрлаб берамиз. Бу ватан соғинчини бироз босгандек бўлади. Бу учун кўпчиликдан рухсат олишимиз керак, ОФКнинг талаблари жиддий».

«Футболчилар ўйиндан кейин кўп овқат емайди»

Футболчилар ўйиндан кейин чарчагани сабаб кўп овқат ейди деб ўйлашингиз мумкин, аммо бундай эмаскан. Жамоамиз шифокори футболчилар ўйиндан кейин асосан суюқлик ичишини айтди: «Футболчилар ўйиндан кейин овқат буюртма қиладими? Йўқ, улар ўйиндан кейин кўп овқат емайди, организм асосан суюқлик талаб қилади. Ўйиннинг эртасига сўрашса, имконини топиш мумкин».

«Хитойда финалдан олдин шўрва қилиб берганмиз»

2018 йил Хитойда U23 жамоамиз чемпионликни қўлга киритгани эсингиздадир. Жамоамиз шифокори ўшанда футболчиларга финалдан олдин қандай овқат берилгани ҳақида гапириб берди: «Хитойдаги мусобақа финалидан аввал футболчиларга шўрва қилиб берганмиз. Ўйиндан икки кун олдин эса ош. Ўзимизнинг чойхона палов эмас, албатта, енгилроқ ош тайёрлаб берганмиз.

Футболчиларнинг ўзи кўп ёки кучли овқат еса, бу майдонда югуришига халақит беришини билади. Чунки улар узоқ йил маълум режимга ўрганган. Масалан, ўйин куни футболчиларга кучли овқат берилмайди».

Ўткир Жалолхонов суҳбатлашди
Тасвирчи ва монтаж: Муҳаммаджон Ғаниев