Гуангжоуда Ўзбекистон бош консуллиги очилади

Тошкент шаҳар ҳокими Жаҳонгир Ортиқхўжаев Хитой элчиси Цзян Янь билан учрашди. Учрашувда Ўзбекистон ва Хитой, хусусан ХХРнинг йирик провинциялари ҳамда шаҳарлари билан Тошкент ўртасидаги муносабатларни ривожлантириш масаласи муҳокама этилди.

ХХРнинг фавқулодда ва мухтор элчиси Цзян Янь Ўзбекистон билан Хитой ўртасидаги ўзаро савдо айланмаси 7,6 млрд. АҚШ долларидан ортганлигини маълум қилиб, бу кўрсаткични бир неча баробар ошириш имконияти борлигини айтиб ўтди.

Учрашувда икки томонлама алоқаларни ривожлантириш масаласи атрофлича муҳокама этилди. Ўзаро ҳамкорликда фармацевтика, электроника, қуёш энергетикаси, робототехника, сабзавот ва меваларни қайта ишлаш каби қатор соҳаларни ривожлантириш истиқболли эканлигига эътибор қаратилди.

Цзян Янь яқин орада Гуангжоуда Ўзбекистоннинг бош консуллиги очилиши режалаштирилаётганлигини маълум қилиб, ўзаро ҳамкорликдаги бошқа тадбирларга ҳам тўхталиб ўтди.

Шунингдек, томонлар Тошкент шаҳрида хитойлик инвесторлар учун яратилган имкониятларга тўхталиб, Хитой томонидан инвестицияларни жадаллаштириш масалаларини муҳокама қилдилар.