NASA’да ишлаган энг кекса америкалик математик вафот этди

Бу ҳақда NASA ўз сайтида маълум қилди.

“NASA Кэтрин Жонсон бугун эрталаб 101 ёшида вафот этганидан дилда ўкинч билан хабар топди. У америкалик қаҳрамон эди ва унинг буюк тадқиқотлари ҳеч қачон унутилмайди”, деб таъкидлаб ўтган NASA директори Жим Брайденстайн.

 “Собиқ иттифоқда 1957 йилда тарихдаги биринчи сунъий йўлдошнинг учирилиши Кэтрин Жонсон ҳаётида бурилувчи он бўлган”, дейилган хабарда. 

Олима 1957 йилда фазовий парвозлар имкониятини баҳолаш билан шуғулланган махсус гуруҳ таркибига кирган муҳандислар учун “Коинот технологиялари ҳақидаги қайдлар” деб номланган ҳужжатнинг математик анализ қисмини тайёрлаган. Жонсон, шунингдек, 1961 йилда астронавт Алан Шепарднинг суборбитал парвози траекториясини, 1962 йилда эса фазога учган биринчи америкалик астронавт Жон Гленнинг орбитага парвозини таҳлил қилишда, “Аполлон” ой дастури ва кўп маротабалик Space Shuttle фазовий кемалари парвозлари дастурида иштирок этган. 

Жонсон NASA’да 33 йил давомида ишлаган. 2015 йилда у АҚШдаги энг олий мукофотлардан бири – Президентнинг Озодлик медалини олган. 2017 йилда эса NASA’нинг Виржиния штатидаги тадқиқот маркази унинг шарафига аталган.

2016 йилда Жонсон ва NASA’да 1960-йилларда ишлаган ҳамда ўз ҳуқуқлари учун курашган қора танли аёллар ҳақида “Яширин шахслар” китоби нашр этилган. Шунингдек, ушбу китоб асосида шу номли фильм ишланган.