Эрон парламенти коронавирус эпидемияси сабабли ўз ишини тўхтатди

Эрон парламенти коронавирус эпидемияси сабабли ўз ишини тўхтатди. Маълум қилинишича, 4 депутат коронавирусга чалинган. Шунингдек, 30 депутат коронавирусга тест топширган.

Фото: AP

Парламент иши тўхтагани ҳақида унинг президиуми вакили Асадулла Аббосий маълум қилган.

Таъкидланишича, парламент йиғилишлари кейинги кўрсатмалар маълум қилинмагунча ўтказилмайди.

Эронда бир неча юқори лавозимли шахслар коронавирусга чалинди. Жумладан, 27 февралда Эроннинг аёллар ва оила ишлари бўйича вице-президенти Маъсума Абтахор коронавирусга чалингани маълум қилинди. Бундан аввалроқ Эрон соғлиқни сақлаш ва тиббий таълим вазири ўринбосари Ирож Харирчи, парламент депутати Маҳмуд Содиқий коронавирусга чалинганларини маълум қилишган. Шунингдек, Эроннинг Ватикандаги собиқ элчиси Ҳоди Хусравшоҳий коронавирус сабабли ҳаётдан кўз юмди.

Охирги маълумотларга кўра, Эронда айни вақтда умумий ҳисобда 245 киши коронавирусга чалинган, улардан 26 киши вафот этган.

Тайёрлаган Шуҳрат Раҳимов

#Эрон #парламент #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.