Норвегияда болалар боғчалари иш фаолиятини бошлади

Норвегияда карантин чораларини юмшатиш доирасида бундан бир ой аввал ёпилган болалар боғчалари қайтадан иш бошлади. Бунда гигиена кўрсатмаларига қатъий рияо қилиш шарт: болалар билан фақат кичик гуруҳларда машғулот ўтказиш мумкин.

Ҳукумат қарорига кўра, уч ёшгача бўлган болалар уч нафаргача, уч ёшдан олти ёшгача бўлганлар олти нафаргача тарбияланувчи бўлган гуруҳларга бўлинади. Ҳафта давомида бошланғич мактаблар ҳам ишлай бошлаши кутилмоқда.

Норвегия ҳукумати икки ҳафта илгари кескин чоралар босқичма-босқич юмшатилишини эълон қилганди. Қайд этилишича, мамлакатда коронавирус эпидемияси "назоратга олинган". 

Шу билан бирга, бар ва ресторанлар ёпиқлигича қолади, оммавий ва спорт тадбирларини ўтказиш июнь ўрталаригача бекор қилинган.

Норвегия соғлиқни сақлаш вазирлигининг маълумот беришича, мамлакатда коронавирусга чалиниш билан боғлиқ 7 мингта ҳолат қайд этилган, 154 киши вафот этган.