Оксфорд луғатига коронавирус билан боғлиқ янги сўзлар киритилди 

Бу ҳақда The Guardian нашри хабар берди. 

Луғатда “ижтимоий масофа”, “ўзини яккалаш” ва WFH аббревиатураси, яъни work from home (уйдан ишлаш) иборалари пайдо бўлган.

“Бу бир сўзнинг (COVID-19) қисқа вақт ичида қўлланиши кескин ошиши ва унинг тилда устунлик қилиши кузатилаётган камдан-кам учровчи ҳолатдир”, деб айтган луғат муҳаррирларидан бири Бернадетт Пэтон.

COVID-19 сўзининг ўзи эса луғатга “одамларда коронавирус билан чақирилувчи ўткир респиратор касаллик, у оғир ҳолатга ва ҳаттоки ўлимга олиб келиши мумкин, айниқса кексалар ва турли касалликларга эга кишиларда” деган таъриф билан киритилган.

Луғатшунослар ҳам айни вақтда кўпчилик каби уйларидан ишлашмоқда. Улар пандемия сабабли юз бераётган ўзгаришларни қайд қилиб, луғатга у ёки бу сўз ёки ибораларнинг киритилиши бўйича ўз таклифларини беришмоқда.

Мутахассислар маълумотларига кўра, ҳозир коронавирус (ёки COVID-19) сўзи тилда устунлик қилмоқда. Ваҳоланки, бунгача декабрда энг кўп қўлланувчи сўзлар “Brexit” ва “импичмент”, январда “коала”, bushfire – “вайронкор ўрмон ёнғинлари”, “саранча” ва “қотиллик” бўлган.