Россия қурилиш вазири ва унинг ўринбосарида коронавирус аниқланди

Аввалроқ Россия бош вазири Михаил Мишустинда коронавирус инфекцияси аниқланганди.

Владимир Якушев Фото: Максим Слуцкий / ТАСС

Россия қурилиш ва уй-жой-коммунал хўжалиги вазири Владимир Якушев SARS-CoV-2 коронавирус инфекцияси билан зарарланди, деб хабар берди вазирлик Telegram-канали.

«Россия қурилиш вазирлиги раҳбари Владимир Якушев касалхонага ётишга қарор қилди. Вазир ва унинг ўринбосарларидан бири Дмитрий Волковда коронавирус ташхиси тасдиқланди», — дейилади хабарда.

«Шаҳар касалхоналаридан бирида даволанаман. Алоқада бўламан», — дея унинг сўзларидан иқтибос келтиради канал.

Якушевнинг вазифасини вақтинча Никита Стасишин бажариб туради.

Аввалроқ Россия бош вазири Михаил Мишустинда коронавирус инфекцияси аниқланганди.

«Ҳозиргина мен коронавирус инфекциясини аниқлаш учун топширган тестларим мусбат натижа бергани маълум бўлди. Шу сабабли «Роспотребнадзор» талабларига кўра ҳамкасбларимнинг хавфсизлигини таъминлаш мақсадида мен ўз-ўзимни изоляция қилиш қоидаларига, врачларнинг кўрсатмаларига амал қилишим керак», деган бош вазир.

Мишустиннинг вазифасини вақтинча унинг ўринбосари Андрей Белоусов бажариб туриши тўғрисида фармон имзоланди.

Охирги маълумотларга кўра, Россияда коронавирус юқтирганлар сони 114,5 мингдан ошиб кетди, 1100дан ортиқ киши вафот этди.

#Россия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.