Пахта кластери раҳбари Тошлоққа ҳоким бўлди

«Ўзбекистон Республикаси Конституциясининг 102-моддасига ҳамда «Маҳаллий давлат ҳокимияти тўғрисида»ги Ўзбекистон Республикаси Қонунининг 2-моддасига асосан, Жўрабоев Абдуқаҳҳор Абдувоҳидович Тошлоқ тумани ҳокими этиб тайинлансин», дейилади Фарғона вилояти ҳокими қарорида.

Маълумот учун, Абдуқаҳҳор Жўрабоев Фарғона вилоятидаги пахта тўқимачилик кластери тизимидаги «Expo Kolor Print tex» МЧЖ бош директори, Халқ депутатлари Фарғона вилоят Кенгашидаги OʻzLiDeP депутатлик гуруҳи аъзоси ҳисобланади.

• Корхоналар ва ташкилотларнинг ягона давлат регистри маълумотларига кўра, масъулияти чекланган жамият кўринишидаги Expo Kollor Prin Teks компанияси 2007 йил 18 июнда ташкил этилган. Регистрда кўрсатилган фаолият тури — пахта толаларини тайёрлаш ва йигириш; устав фонди 4,3 миллиард сўм. Компания раҳбари сифатида Абдуқаҳҳор Жўрабоев кўрсатилган.

Бундан аввалроқ, 2018 йил мартидан буён Тошлоққа раҳбарлик қилиб келган Шуҳратжон Абдусаломов президент иштирокидаги йиғилиш вақтида ишдан олингани хабар қилинганди.