Буюк Британиядаги авиакомпаниялар ҳукуматга қарши даъво тайёрламоқда

Ирландия ва Британия авиакомпаниялари коронавирус сабабли жорий этилган чекловларни бекор қилиш учун жамоавий даъво тайёрламоқда. Бу ҳақда The Telegraph хабар берди.

Буюк Британияда 8 июндан мамлакатга кириб келганларнинг икки ҳафталик мажбурий карантинга олиниши жорий этилганди.

"Нуқтаи назаримиз ҳафта охиригача тингланишига умид қилмоқдамиз. Ички ишлар вазирлиги қандай қилиб ҳимояни таъминлай олишини кўрмаяпмиз", деди нашр суҳбатдошларидан бири.

Авиакомпаниялар раҳбарлари меҳмонлар учун карантин жорий этиш Британия туризми учун жиддий иқтисодий зарар етказади деган фикрда. Уларнинг фикрича, бунинг оқибатида миллионлаб иш ўринлари қисқариши мумкин.

Аввалроқ Британиянинг Virgin Atlantic авиакомпанияси инқироз сабабли 3150 нафар ишчисини ёки ходимларининг 30 фоизини ишдан бўшатиши ҳақида эълон қилганди.