Япон танкери Маврикий соҳиллари яқинида иккига бўлакланиб кетди

Таъкидланишича, 15 август маҳаллий вақт билан соат 16.30 атрофида кеманинг тумшуқ қисми аниқлаган. Мутахассислар тавсиясига кўра уни шатакка олиш режаси тузилган. Маълум қилинишича, шатакчи кемалар танкернинг тумшуқ қисмини шатакка олиб, уни Маврикийдан минг километрча олисда чўктириб юбориш учун олиб кетган. Бироқ танкернинг иккинчи бўлаги айни вақтда маржонқояда қолмоқда. 

Танкер 25 июлда маржонқояларга урилган. Натижада океанга ундан минг тоннага яқин мазут оқиб кетган ва ҳудуддаги маржонқоялар, балиқлар ва бошқа денгиз жонзотларини хавф остига қўйган. Олимлар ушбу ҳодисани Маврикий иқтисодиётига ўнлаб йиллар давомида таъсир қилиши мумкин бўлган экологик фалокат деб аташган. Ўзининг пляжлари, мақжонқоялари билан машҳур бўлган орол-давлат асосий даромадни сайёҳликдан олади.

Маълумотларга кўра, кемадаги аксарият нефть тортиб олинган бўлиб, унда 166 тоннага яқин мазут қолган. Мутассадди идоралар уни бартараф этиш бўйича ишлар олиб борган.  

Япониянинг атроф-муҳит вазири Синдзиро Коидзуми Токио зарарни баҳолаш учун воқеа жойига ўз мутахассисларини юбормоқчилигини маълум қилган. Танкер Nagashiki Shipping япон компаниясига тегишли бўлган.

Шунингдек, Франция фалокат ҳудудига ифлосланишни бартараф этиш учун махсус қурилмага эга бўлган ҳарбий самолёт жўнатган. Япония ҳам французларга ёрдам бериш учун Маврикийга ўз гуруҳини жўнатган.