Япониянинг энг йирик авиакомпанияси 3,5 минг ходимини қисқартиради

Япониянинг энг йирик авиакомпанияси All Nippon Airways 3,5 минг ходимини қисқартирмоқчи. Шу билан бирга, компания бўшатиладиган ходимларига янги иш топишда кўмак беришга ваъда берган.

Фото: PASCAL PAVANI / AFP

Маълумотларга кўра, япон авиакомпаниясида 20 мингга яқин ходим ишлайди.

Аввалроқ авиакомпания ёнилғи ва хизмат кўрсатиш учун катта харажатлар талаб қилувчи самолётларининг ярмидан халос бўлмоқчилиги маълум қилинган.

Октябрь бошида авиакомпания пандемия сабабли кўрилган зарарни қоплаш учун ўз ходимлари маошларини 30 фоизга қисқартириши ва бонусларни бекор қилишини эълон қилган.

Таъкидланишича, пандемия сабабли япон авиакомпаниялари халқаро рейслари 99 фоизга қисқариб кетган.