Хитой антимонополия бошқармаси Alibaba Group’га нисбатан суриштирув бошлади

Alibaba Group Holding Ltd шартномалар бўйича эксклюзив келишувлар тузиш ва бошқа қонунбузишларда гумон қилинмоқда.

Фото: REUTERS/Lai Seng Sin

Хитой бозорларни мувофиқлаштириш бошқармаси Alibaba Group’га нисбатан антимонопол суриштирув бошлади.

“Бугун бозорларни мувофиқлаштириш бошқармаси Alibaba Group монополистик ҳаракатларда гумонланиб, унга нисбатан суриштирув бошлангани тўғрисида хабардор қилди. Alibaba суриштирув бўйича фаол ҳамкорлик қилади. Компания ҳозирда одатдаги тартибда ишламоқда”, — дейилади компаниянинг Weibo ижтимоий тармоғидаги хабарида.

Alibaba Group Holding Ltd шартномалар бўйича эксклюзив келишувлар тузиш ва бошқа қонунбузишларда гумон қилинмоқда. Ҳонгконг фонд биржасида компания акциялари нархи 8,1 фоизга пасайди.

Аввалроқ Хитой ҳукумати Alibaba асосчиси Жек Мага мамлакатни тарк этмасликни тавсия қилгани тўғрисида хабар берилганди.

Alibaba Хитойдаги энг йирик электрон тижорат платформаларига эга.