Озарбойжон Тоғли Қорабоғда халқаро аэропорт қуришни бошлади

Илҳом Алиевнинг сўзларига кўра, аэропорт хориждан келадиган юкларни қабул қилиш ҳамда қўшни давлатлар фуқароларининг Шуша шаҳрига осон етиб боришларига имконият яратади.

Фото: Emrah Gurel / AP

Боку Тоғли Қорабоғдаги Фузулий районида халқаро аэропорт қуришга киришди. Бу ҳақда Озарбойжон президенти Илҳом Алиев маълум қилди.

"Фузулийдаги аэропорт бўйича ишлар бошланди. Аэропорт тез муддатда фойдаланишга топширилади. Барчаси режадагидек кетса, шу йилнинг кузида аэропорт фойдаланишга топширилади", - деди у.

Озарбойжон президентининг қўшимча қилишича, аэропорт хориждан келадиган юкларни қабул қилиш ҳамда қўшни давлатлар фуқароларининг Шуша шаҳрига осон етиб боришларига имконият яратади.

Алиев аэропорт билан бирга, Шуша шаҳрига олиб борадиган иккита автойўл қурилаётганини айтди.

Унинг таъкидлашича, Фузулийдаги аэропорт барча турдаги, жумладан, энг оғир самолётларни ҳам қабул қила олади.